Ува ёросын Гуждор сямез ортчытӥзы

    Ува ёросын гуждор сямез ортчытӥзы 1

    Вазь ӵукна ик, ува калык люкаськытозь, йылолэз ортчытыны ваньмыз дась вал ини: тылскемын, ӝӧкъёс пуктылэмын, 3 пуртыосын сиён пӧзьтэмын. Вылӥ Инмарлы — тари кеньырен, вӧйын ӝук, Куазьлы — суро кеньырен ӝук, Кылдысинлы — чорыг лым.

    Ваньмыныз кивалтӥз Пекшурысь воргорон Василий Михайлович Тратканов. Со кадь вашкала сям-йылолъёсты тодӥсьёс шаерамы чиньыен лыдъямон.

    Вӧсяськон кутскемлэсь азьло калык курбонлы ваем сиён-юонзэ со музъем вылэ вӧлдэм ӵушкон вылэ тыриз. Нырысь ик Вылӥ Инмарлы вӧсяськон ортчиз. Вӧсяськисьёс тари ӝукез, курбон нянез, шунтэм вӧез тылскем вылын возизы. Инмарлы вазиськыкузы, сиёнэз тылскеме пичиен куязы.

    Собере азинтӥзы Куазьлы куриськон йылолэз. Ӝукен, нянен, вӧйын вылӥ мычон ортчытӥзы: инкуазьлы тау кылъёс вераса, одӥгез вӧсясь пагӟаетӥ тубиз, 400 аръем Мудор пужымлэн зӧк ваяз кузьым — нянь — понӥз.

    Та бӧрсьы куронъёсын вазиськизы Куазьлы. Вашкалаосмы сямен ик, вӧсясьёс куризы киземъёссэс утьыны, дыраз шунытсэ, зорзэ сётыны, лудъёсын кизем юос мед удалтозы, Куазь калыкмес сильтӧлъёслэсь, йӧзоръёслэсь мед утёз шуыса.

    Собере черод вуиз пеймыт дуннеысь Инмарлы, Кылдысинлы, вазиськыны. Тазэ йылолэз ортчытон понна басьтӥзы чорыг лым, нянь но шунтэм вӧй. Пу куен (лопата) гоп лэсьтыса, отчы чипей йырез согизы. Удмуртъёс одно ик та чорыгез куто вылэм. Котькудӥз вӧсясь ас валамезъя, ас тодэмезъя, ас кылъёсыныз вазиськылӥз Кылдысинлы.

    Куриськон-вӧсяськон йылпумъяськем бере вӧсясь тӧро ӧтиз вань калыкез ӝук сиыны. Луоз шат Гуждор геры поттонтэк! Калык геры бере кылдэм бороздае йыды, курегпуз куяз. Собере нылпиос курегпузъёсты питыръяса шудӥзы, круген ветлӥзы. Йылпумъяськиз Гуждор Мудор пужымлы чукъёсын, лентаосын курбон сётонэн, тау каронэн, йыбырттонэн.