Ува каргуртысь нылпи библиотека ӟуч пиналъёсты удмурт кылэн тодматэ
Зоя Ивановна Зарипова огвакытэ библиотекаын удмурт кылъя кружок нуыны кутскиз вал. Отчы 2-тӥ школаысь нылпиос ветлӥзы.
— Мылкыды ӝож луылӥз, Удмуртиын улыса, пиналъёс анай кылмылэсь английскойзэ но немецкойзэ ӟечгес тодо шуыса, — вера З. Зарипова. Озьы малпан кылдӥз кылэз азинтонъя проект кылдытыны, со вал 2015-тӥ арын. Ужмы элькунамы 10 кужмоосыз пӧлы сюриз, 100 сюрс манет утӥмы. Та уксё чотын 100-лэсь уногес удмурт кылын чеберлыко литература, энциклопедиос, кыллюкамъёс, шудонъёс басьтӥмы. Быдэс ар ӵоже каргуртысь нылпиосын пӧртэм ужрадъёс ортчытъямы, оглом вераса, отчы пыриськизы ог 700 пиналъёс. Проект ӟуч яке ӟучомем пиналъёсты удмуртомытон понна чакламын ӧй вал, соосты ужрадъёс пыр удмурт кылэн, культураен, сям-йылолъёсын тодматэммы потӥз. Библиотекаын арбериослэсь удмурт нимъёссэс гожъяса возимы, пырись-потӥсь соосты лыдӟылӥз но тодаз кельтылӥз. Ар пумын бадӟым ужрад ортчытӥмы, удмурт сиёнъёсын ӝӧк пуктӥмы, кырӟамы, кылбур лыдӟимы. Пиналъёсын ужаса, адӟи: соослы кыл тунсыко, угось библиотекае шумпотыса ветлылӥзы, удмурт кылъёсты тыршыса дышетӥзы. Но удмурт кылэз тодыны мылкыд карисьёс арысь аре тросгес уг луо. Анай-атайёслэн нылпиоссэс дышетэмзы уг поты уго.
Соин валче проект йылпумъяськем бере кышкасько вал, удмурт книгаос тузонӟыса сылозы шуыса. Но 2-тӥ арзэ библиотекаямы удмурт курсъёс ортчо. Отчы ветлӥсь адямиос книгаосмес мыло-кыдо лыдӟо. Собере, арлы быдэ Анай кыллэн нуналэзлы бадӟым ёрос ужрад ортчытӥськом. Туэ К. Гердлэн но А. Окилэн 120 ар тырмонзылы удмурт кылэз дышетӥсь 5 школаосысь пиналъёс кылбур лыдӟизы. Кылем арын сыӵе ик бадӟым пумиськон сӥземын вал нылпи писательлы Г. Ходыревлы, соку 71 кылбур чузъяськиз. Вуоноезлы но туж бадӟым малпанъёсмы. Кылсярысь, 2019-тӥ арын асьме палась писательлэн Григорий Симаковлэн 100 аръем юбилеез луоз. Солы дасяськыны кутскомы туэ ик. Г. Симаков инкуазь сярысь гожъялляз бере, чакласькомы нылпиосты но инкуазен герӟаськем веросъёс, сочинениос гожъятыны.
«Удмурт Кенешенымы», мон та огазеяськонлэн ёзчиез луисько, куспамы вераськимы вал ини ёросамы Г. Симаковлэсь премизэ кылдытоно шуыса.