«Улэп» открыткаос

Кызьы вераз «Монами» удмурт дизайн-мастерскойысь усточи Андрей Соловьёв, кылдытӥсьёс «Открытка из Ижевска» акцилэн малпанэз бордысь мылкыд басьтӥзы.

«Сыӵе ватсэт лэсьтыны малпан кылдэм дырысен сое улонэ пыӵатон дорозь ӝыны ар ортчиз, но со бордын ми кема ик ӧм ужалэ. Милям ужпуммы вал суреданы чебер открыткаос, озьы ик программистлэсь ужзэ но Тол Бабайлэсь видеоӟечкыланзэ гожтонэз радъяны», — тодаз вае открыткаосты кылдытӥсь.

«Ватсам улон» — туала компьютер технология, кудӥз улонын ӧвӧлтэм макеосты «суредаса ватсаны» луонлык сётэ. Сыӵе амалъя ик дуннеез вырӟытэм Pokemon Go шудон лэсьтэмын. Тол Бабаен «улэп» открыткаосты кылдытон бордын ужаз Григорий Григорьев.

«Ватсэт ӟечкыланэн видеоез возьматон понна кутэ. Туннэ нуналлы ватсэт Android-лы гинэ лэсьтэмын вал, но азьланяз со выллем ватсэтъёсты iOS-лы но лэсьтыны мылкыд вань», — шуиз Григорий Григорьев.

Огъя вераса, Выль арлы карточкаосын кӧня ке серия поттӥзы: туспуктэмен открыткаос, удмурт тусъем пудо-пӧйшуръёсын суредъёсын открыткаос: гондырен, атасэн, ӟичыен но койыкен, кудъёсыз Выль арен кылбурен ӟечкылало но Тол Бабаен но Лымы Нылэн «ватсам улон» технологиен вить пӧртэм открыткаос.

Удмуртиысь Выль ар выжыкыл геройёс «улэп» открыткаосын кӧня ке кылын верасько.

«Вань удмурт, ӟуч но англи кылын открыткаос. Сыӵе открыткаосты посткроссеръёс ярато, соос мукет кунъёсы келяло, озьы ик соос финн-угор дуннеын вӧлмемын. Открыткос Финляндие, Эстоние но мукет финн-угор каръёсы «лобо», — валэктэ ӵектослэн огез кылдытӥсез.

Открыткаосты басьтыны луэ Ижкарысь вузкарон интыосысь, Шарканын Тол Бабайлэн юртысьтыз, Глазкарысь шаертодонъя музейысь но Алнашысь. Но соослэсь вань паймымон луэмзэс адӟон понна телефонэ нимысьтыз ватсэтэз кыскыны но пуктыны кулэ.

Ватсэт Выль AR нимаське. Сое шедьтыны но телефонэ пуктыны луэ Google Play интернет-магазинысь. Со дунтэк вӧлмытӥське.

Тол Бабайлэн но Лымы Ныллэн выль ар ӟечкыланъёсынызы открыткаос 1 сюрс тиражен потӥзы.