Удмуртъёсын тодматскыны – Екатеринбурге!

Таяз арын 30-лэсь уно кунокуаоссэс усьтӥзы пӧртэм йӧскалык огазеяськонъёс: ӟучъёс, поръёс, бигеръёс, башкиръёс, армянъёс, таджикъёс, немецъёс, еврейёс но мукетъёсыз.

Соос пӧлын асьсэды туж йӧно возьматӥзы удмуртъёс. Удмуртъёслэн «Эгес» огазеяськонзы дасяз аслэсьтыз «ЭГЕС» кунокуазэ.

«Огазеяськонмылы туэ 15 ар тырме, соин ужрадын тыршимы котырласянь возьматыны ужмес но, калыкмылэсь культуразэ но. Радъямы вашкала арбериосын адӟытон, поттӥмы али лэсьтэм ужъёсмес но, Удмурт воскресной «Ваёбыж» классэ ветлӥсь пиналъёслэсь киужъёссэс, пуктӥмы концерт», – ивортэ «Эгес» огазеяськонлэн кивалтӥсез Марина Ягуткина. – Учкисьёс тунсыкъяськизы куэм но вурем дэремъёсынымы, пужыослэн историенызы. Озьы ик паймизы, киын лэсьтэм выжлёгетъёсмес, кутъёсмес, куиськон арбериосмес адӟыса. Та нуналэ ми ортчытъямы на мастер-классъёс. Кылсярысь, Сысертьысь Машапай дышетӥз куиськыны, нош «Азвесь гур» ансамбльысь усточиос Ольга Данилова но Ринат  Рахимзянов – тыпыртыны».

Кунокуаямы нуналбыт ӧз дугдэ чузъяськемысь удмурт кырӟанъёс, соосты быдэстӥзы Екатеринбургысь «Азвесь гур» но Улӥ Сергино муниципал ёросысь «Инвожо» ансамбльёс. Та нуналэ ик удмурт коллеквтивъёс пыриськизы на бадӟым шулдыр концертэ.

«Милям кунокуамылы синмаськизы кивалтӥсьёс но: дорамы кожазы Свердловск улосысь губернаторлэн администрациысьтыз но Свердловск улосысь Законодательной собраниысь ужасьёс. Ми куноосмес шулдыр удмурт гурен пумитамы, самоварысь турын чаен но перепечъёсын, пӧртэм кеньыръёслэсь пӧзьтэм ӝукен куноятӥм. Возьматӥмы соослы адӟытонмес, вакчияк верамы огазеяськонмы но ужаммы сярысь, нош собере туспуксимы соосын но пичияк кузьымъёс сётӥмы», – ивортэ Марина Ягуткина.

Шор Уралысь калыкъёслэн нуналзы улсын ик Шор Ураллэн культурая центраз (Центр традиционной народной культуры Среднего Урала) усьтӥськиз тунсыко этнографической выставка, со сӥземын Уралын улӥсь калыкъёслэн пыдкутчанъёссылы. «Всем Богам по сапогам. От лаптей до сапог» адӟытонэ ми но шумпотыса пыриськиськом. Пӧртэм пумо пыдкутчанъёсты Екатеринбургын учкыны луоз 23-тӥ куарусёнозь.

http://udmurtkenesh.ru/udm/news/udmurtskoe-podvore-eges-na-prazdnike-den-narodov-urala/

Поделитесь с друзьями:

Журналист, редактор сайта, руководитель и куратор медийных проектов, продюсер и ведущий интернет-телеканала "Даур ТВ"

Дом Дружбы народов
Добавить комментарий