Удмуртомозы Янош Араньлэн чуръёсыз
— Семинарез, венгер берыктӥсьёслэн фондзылэн тӧроез Петер Рац юрттэмен, радъяны быгатӥмы, — вера семинарлэн уженыз кивалтӥсь, Историяя, кылъя но литературая удмурт институтысь ӧнерчи Александр Егоров. — Ӵапак со ик ӵектӥз Янош Араньлэсь кылбуръёссэ бырйыны, уго кылбурчилэн 200 аръем юбилеез матэктэ. Арня куспын 5 кылбур берыктэмын луоз, нош печате потозы-а, ум на тодӥське, оло, «Удмурт дунне» газетэ печатланы луонлык шедёз.
Александр Егоров юнме кивалтӥсе пуктэмын ӧвӧл. Берыктон ужен со 2004-тӥ арысен выре ни. Венгриын ортчылӥсь пӧртэм семинаръёсы но стажировкаосы пыриськылӥз, психоанализъя научной статьяосты ӟуч кылэ берыктылӥз. 2015-тӥ арын Дмитрий Ефремовен валче поттӥзы мадьяр кылысь удмуртэ берыктэм произведениосын «12 тужгес но чебер верос» книга.
Поэзиез берыктонэн Удмурт кун университетысь 2 студентъёс но Будапештын дышетскись 3 удмурт студентъёс выро.
— Балинт Балашши нимо университетын мон прозаен ужасько, соин кылбуръёсты берыктон мон понна выль но тунсыко ӧр луэ, — вера Марина Романова. — Удмурт кылэз мон быдэ вуыса гинэ дышетыны кутски бере, пӧртэм шуг-секытъёсын пумиськисько. Александр Егоровлэсь но удмурт коллегаосылэсь юрттэт курыны, шугъяськытӥсь юанъёсме сётыны умой луонлык кылдэ.
Нош Удмурт кылосбуръя, финно-угроведениея но журналистикая институтын дышетскись Павел Зорин азьланяз берыктон ужен вырыны малпа.
— Шумпотӥсько, ӟеч тодон-валан басьтыны луонлык кылдӥз шуыса, — шуэ со. — Янош Араньлэн кылбуръёсыз туж муресь, ӝож мылкыдоесь. Вашкала кылъёс пыртыса гожъямын бере, вуж кыллюкамъёсын трос утчаськоно луэ.