Удмуртиысь йӧскалык театр нырысьсэ мюзикл пуктыны басьтӥськиз
Вераны кулэ, спектакль ӟуч кылын пуктэмын.
«Вань сыӵе постановкаос, кудъёссэ удмурт кылын лэсьтыны уг луы. Ми малы лэсьтӥмы на тае эшшо — возьмаськомы удмурт мюзикл гожтэмзэс. Гожтӥзы ке, ми дась сое пуктыны. Татын кулэ луыны крезьгурчи, татын луыны кулэ, кылбурен ке со, кылбурчи но автор-драматург. Татын огшоры гинэ уж ӧвӧл — пластика, артистлэн ужез, ваньмыз… Со бордын туж бадӟым секытэз», — вераз режиссёр Алексей Ложкин.
Мюзикл пуктыны басьтӥськыса, зэмзэ но тросэзлы выльысь дышетсконо луиз. Артистъёсын нимысьтыз ужазы кырӟанъя дышетӥсь Валерий Каракулов, эктонъя дышетӥсь Полина Лебедева. Геройёслы дӥськут кылдытон бордын тыршиз тодмо модельер Олег Ажгихин. Нош пуктӥсь суредась интые ӧтизы архитекторез Касим Галихановез.
«Малы басьтӥм архитекторез суредась интые — мыным кулэ вал дунне шоры архитектор сямен учкон. Тани та декорация — со милям шудон корка но, со ик милям таверна но, со ик милям пӧртэм-пӧртэм эшшо мар но луоз, созэ уг вера», — пусйиз Алексей Ложкин.
Пусъёмы, «Алые паруса» мюзикл Россиысь лулчеберетъя министерство юрттэмен пуктэмын. 2017 году йӧскалык театр «Культура России» нимысьтыз федерал программая грант утӥз.
ВАТСАН
Яратон, паймымонэзлы оскон сярысь «Алые паруса» кузьвероссэ Александр Грин (нялтас вераса со вордскемын Вятской губерниын) гожтӥз 1916–1922 аръёсы. Мюзикллы крезьгур гожтӥз тодмо крезьгурчи Максим Дунаевский, кылбур но либретто Михаил Бартенев но Андрей Усачёв. Нырысьсэ сое пуктӥзы 2010-тӥ арын Москваын (РАМТ).