Удмуртиысь учкымон интыосын выль книга поттӥзы Ижкарын

«Вераны кулэ, таӵе книгаосты лыдӟисьёсмы милям туж куро, малы ке шуоно со сӥземын быдэс Удмуртилы, солэн историезлы, солэн калыкезлы. Таиз книга маиныз аспӧртэмлыко – со люкемын пӧртэм люкетъёслы. Нимаз сётэмын городъёс, котькуд городлэн аслаз тунсыко интыосыз, чебер интыосыз, кудъёсыз кыско элькунамы улӥсьёсты но, куноосты но. Шуом, памятникъёс, инкуазен герӟаськем чебер интыос, вашкала коркаос, тодмо адямиосын герӟаськем интыос», — шуэ книгалэн огез кылдытӥсез, книгапоттонниысь валтӥсь редактор Георгий Грязев.

Книга бадӟым форматэн, яркыт буёло, трос бадӟым туспуктэмъёсын поттэмын. Туспуктэмъёс борды вакчияк валэктонъёс ватсамын. Гожтӥсьлэн кылъёсызъя, со туспуктэмъёсын альбомлы но золгес укша.

«Бадӟымесь фотографиос, быдэс страницалы, кык страницаосын разворотэн сётэмын. Вакчияк сётэмын тани Сарапуллэн историез, тодмо интыосыз. Вӧзаз ик чебересь сыӵе буёло фотографиос, туспуктэмъёс, шуом, текст дополнять каре фотографиез, фотография подтверждать каре текстэз. Вот тӥни сыӵе структураен лэсьтыны тыршим. Текстэз трос ӧвӧл, лыдӟисез медаз загружать кары шуыса, синмыныз со чеберзэ мед адӟоз шуыса», — вера Георгий Грязев.

Авторъёслэн малпамзыя, книга кузьымлы туж тупалоз: тодмоослы, ӵыжы-выжыослы, палэнысь лыктэм куноослы. Озьы ик со тунсыко луоз шаерчиослы но, пиналъёслы но, туристъёслы но.

Ивортодэтъя «Удмуртия» агентстволэн материалэзъя.