Удмуртиысь «Тамга» удмурт видеошкола дышетскисьёсызлэсь йылпумъян ужзэс возьматӥз

Егитъёс Алексей Пикулевлэн но Иван Белослудцевлэн «Тӧл» кырӟанзылы клип пӧрмытӥзы.

«Оскиськом, видеосузьетмес учкыса, котькуд адями аслыз тупась пуштроссэ шедьтоз. Уго ньыль минут куспын ми тыршимы улонлэсь мур кожъёссэ возьматыны», — «Куара» огазеяськон.

Клиплы видеосуредъёс Пурга черкогуртын лэсьтӥськизы. Егитъёс ужазы пичи дырысь тодэ ваёнъес пыр удмурт гуртын улон-вылонэз, шуныт семья кусыпъёсты возьматыны тыршизы. Азьло но туала герӟетъеслэсь мур кужымзэс усьтӥзы.

Тодады вайтом, удмурт егитъёс понна видео удысъя дышетскон туэ гужем «Куара» огазеяськонэн Удмуртиысь йӧскалык политикая министерство юрттэмъя радъяськиз. Отын операторъёс, сценаристъёс, монтажёръёс тодон-валан басьтӥзы.