Удмуртиысь пыӵал тӥрлык лэсьтӥсьёслы синпелет усьтӥзы Ижкарын
«Та композицилэн пуштросэз тодэ кылем суредэз возьматэ – станок дорын сылӥсь нылпиосты. Ми со вакытлы быдэсак тупась образэз, экспозициез, синпелетэз кылдытыны тыршимы», — вера Валерий Грахов, Ижкарысь техникая кун университетлэн ректорез.
Синпелетэз Ижкарысь мотозаводысь егитъёслэн комсомол бригадаысьтызы пиослэн туспуктэмзыя лэсьтӥзы. Со токарной станок азьын сылӥсь куинь ужасьёсты возьматэ. Ужан тӥрлык зэмос – сое Ижкарысь техникая кун университетлэн подвалысьтыз шедьтӥзы. Валерий Граховлэн верамезъя, станок ож вакытысь. Синпелетэз Россиысь суредасьёслэн огазеяськонзылэн ёзчиез Павел Медведев кылдытӥз.
«Кулэ вал соосты лэсьтыны, соослэсь шӧдонъёссэс возьматыны. Со огшоры синпелет ӧвӧл ук. Малпасько, та Россиын нырысьсэ, куке урамын таӵе музей», — шуэ Павел Медведев, синпелетэз кылдытӥсь.
Синпелет пуктыны кичӧлтонэн Ижкарысь техникая кун университет 2018-тӥ арын куарусёнэ Пыӵал тӥрлык лэсьтӥсьёслэн форумазы потӥз. Кылем арын толсуре ӵектосэн выль синпелетъёсъя «Культурный след — 2019» огъяросси вожвылъяськонэ потӥзы. Экспертъёслэн кенешемзы бере синпелет вить вормисьёс пӧлы сюриз. Сое вожвылъяськонэ ӵектэм 550 малпанъёс пӧлысь бырйизы. Синпелетэз грантэн, университетлэн но партнёр луись предприятиослэн коньдонэнызы пуктӥзы.
10-тӥ шуркынмонэ Ижкар пыӵал тӥрлык лэсьтӥсь тодмо конструкторлы Михаил Калашниковлы 100 ар тырмонэз пусъёз.