Удмуртиысь калыкъёс сярысь «Возвращение к истокам» энциклопедиын вералозы
«Возвращение к истокам» энциклопедия – со этнографи экспедициосы потаса Приволжск федерал округын улӥсь калыкъёслэн сям-йылолъёссы, лулчеберетсы сярысь фильмъёсын бичет. Экспедициос улсын оглом 14 фильмъёс лэсьтэмын луозы.
Энциклопедие творчествоя коллективъёс, вашкала сямен кырӟасьёс, ӧнерлыко коллективъёс озьы ик калык киужен вырись кибашлыос пырозы.
Ижкарын ӧнерчиос «Чебеляй» но «Чипчирган» коллективъёсын, фольклор кырӟанъя но эктонъя «Айкай» театрен пумиськозы. «Лудорвай» музейын «Азвесям» ансамблез гожтозы, Балезино ёросын – бесерманъёслэсь гуръёссэс но сям-йылолъёссэс. Озьы ик энциклопедие «Мугур» студиын горд сюйлэсь удмурт шудонъёс лэсьтонэз пыртозы.
«Со туж умой луонлык кунмылэсь узыр лулчеберет, озьы ик истори кылёсбурзэ адӟыны но выль сямен валаны. Али калык творчество – со гуртъёсысь песянайёс гинэ ӧвӧл, со трос егитъёс но, мыло-кыдо адямиос, кудъёсыз вань сюлмынызы ужзэс ярато, синъёссы ӝуало, ӵапак соос сярысь милям вераммы потэ», — иворто «Возвращение к истокам» ӵектослэн гожтӥсьёсыз.
Энциклопедиез улосвыл телеканалъёсын возьматозы, озьы ик лулчеберет но йӧскалык центъёсы вуттозы.
Пусъём, энциклопедие пыртон понна съёмкаос Марий Элын, Чувашиын, Татарстанын, Нижний Новгородын но Ульяновскын ортчизы ини. Удмуртиын ужамзы бере, ӧнерчиос Пермь шаере но Киров улосвылэ мынозы.