Удмуртиысь калык выжы огазеяськонъёслэн туэ ужамзылы йылпумъянъёс лэсьтӥзы

Йӧскалык политикая министр Лариса Буранова калык выжы огазеяськонъёслэн кивалтӥсьёссылы шаерамы йӧскалык политикаез азинтонын тыршемзы понна тау карон кылъёссэ вераз.

«Ортчись аре выль проектъёс бордын уж кутскиз, — шуиз министр. – Кылсярысь, коньывуонэ егитъёслэн «Вместе» дышетон центрзылэн нырысетӥ сессиез ортчиз. Ужӵектосэз йӧскалык ужпумъёсъя Федерал агенство но умоен лыдъяз».

Лариса Буранова пусйиз, вуоно арын но Элькунысьтымы вань йӧскалык но лулчеберетъя огазеяськонъёс нимысьтыз юрттэт басьтозы.

«2016-тӥ арын, кылеменыз ӵошатыса, 2 поллы тросгес ужрадъёс ортчытӥзы йӧскалык огазеяськонъёс, — вераз Калыкъёслэн Эшъяськон юртсылэн кивалтӥсез Татьяна Боталова. – Шумпоттэ ужрадъёслэн пуштроссы но ӟечлыксы».

Кенешез йылпумъяса, Лариса Буранова вань люкаськемъёслы «Республика» журналэз кузьмаз. Отын йӧскалык политикая Министерствоын ужасьёслэн но калык выжы огазеяськонъеслэн азьветлӥсьёссылэн "Большая команда Ларисы Бурановой" ним улын интервьюзы печатламын.