Удмуртиысь егитъёслэн тодосъя ужъёссы Студентъёслэн калыккуспо финн-угор конференцизылэн бичетаз пыризы

«Удмуртиысь 6 студентъёс (ИУФФУиЖ-ысь) мынӥзы. Озьы ик магистрант вал Влад Степанов, Лариса Дмитриева мынӥз. Озьы ик удмурт делагциын луизы Ольга Степанова (Тронина) — аспирант, тодосэн тунсыкъяськись Алина Крестьянинова, Павел Кутергин — таиз Тартуын дышетске, одӥгез секцилэн модераторез Николай Анисимов вал, со али тоже Тартуын», – вера Удмурт кун университетысь конференцие пыриськись студентка Юлия Ильмурзина.

Солэн кылъёсызъя, асьме егитъёс пӧртэм ӧръёсъя веранъёс дасязы. Кылсярысь, кылосбур, фольклор, журналистика но мукет. Конференциын вормисьёсты ӧз быръе, но ваньмыз ужъёс ужрадлэн бичетаз пыризы. Ачиз Юлия «Журналистика» ӧнеръя дышетске бере, докладэзлэн темаез но та удысэн герӟаськемын вал.

«Ужлэн нимыз: «Границы редактирования и цензурирования (на примере удмуртских СМИ)». Ужъёсмы милям печатласькизы бичетын, отчы докладэ удмурт кылын потӥз: «Цензура, яке стилистика ласянь тупатон гинэ». <…> Докладме кема дасяй. Бадӟым уж лэсьтоно луиз. Совето вакытэ ужам журналистъёсын, редакторъёсын герӟаськи. Куке вылӥ ёзэтъёсы но вуоно луиз», – азьланьтэ Юлия Ильмурзина.

Со верамъя, конференцилэн валтӥсь куронэз — «Правило трёх языков», студентъёслэн дасям ужзы куинь кылын луыны кулэ, одӥгез соос пӧлысь одно ик финн-угор кыл. Озьыен, Юлиялэн докладэз ӟуч кылын вал, презентациез — англи кылын, нош бичетэ ужез удмурт кылын пыриз.

Кызьы шуэ дышетскись, та выллем ужрадъёсын пӧртэм кунъёсысь калыкен эшъяськыны луэ, азьланяз герӟет возьыны луонлык кылдэ.

«Асьме музъемын гинэ ӧвӧл, финн-угор калыкъёс мукет кунъёсын уло. Соин туж данъяськымон вал, пӧртэм интыысь егитъёс соослэн улон-вылонэнызы, лулчеберетэнызы, йылолъёсынызы тунсыкъясько, лэчыт ужпумъёсты сэртто-пертчо шуыса. Кылсярысь, Германиысь студент удмурт кылэз, пе, дышетӥсько. Венгриысь дышетскись коми кыллы синмаськиз, та выллем учыръёс трос», – вера Юлия Ильмурзина.

Ужрадлэсь пуштроссэ дунъяса, Юлия Ильмурзина пусйиз радъясьёслэсь вылӥ ӟечлыко дасяськемзэс. Ужрадлэн программаез туж узыр вал: Тарту каретӥ экскурсия, Йӧскалык музее ветлон, делегациосын тодматскон вылысь лулчеберетъя ӝыт. Адӟиськиз, ӵектосэз радъясьёс ваньзэ рос-прос малпаллям шуыса, йылпумъяз нылаш.

Ватсалом, конференцие пӧртэм кунъёсысь но каръёсысь 190 егитъёс пыриськизы. Вуоноез IFUSCO Австрилэн шоркараз — Венаын — ортчоз.

https://udmurt.media/udm/news/obrazovanie-i-nauka/35948/

Поделитесь с друзьями:

Журналист, редактор сайта, руководитель и куратор медийных проектов, продюсер и ведущий интернет-телеканала "Даур ТВ"

Дом Дружбы народов
Добавить комментарий