Удмуртиысь блогеръёс Финляндиын мерлыко вотэсъёсысь финн-угор азьветлӥсьёслы сӥзем ужрадъёсы пырисько

13 мурт вормисен лыдъямын вал: этнограф Тимофей Молданов (Ханты-Мансийск автоном округ), кылысь кылэ берыктӥсь Василий Епанов (Пермь улос), кылбурчи Альберт Окотэтто (Ямало-Ненец автоном округ),  рэп-кырӟась Ярсэм Галкин (Мурманск улосвыл).

Соосын ӵош Финляндие Удмуртиысь 4 мурт мынэмын — Ижкарысь Эшъяськон юртысь ӧнерчи, удмурт егит азьветлӥсь Богдан Анфиногенов, «Лудорвай» музейысь наукая ужась Анастасия Иванова, «Куара» центрлэн кивалтӥсез Владислав Степанов но кылысь кылэ берыктӥсь Лукерья Шихова.

Соос лекциос кылзӥзы, Финляндиын улӥсьёсты тодматӥзы ас анай кылынызы, лулчеберетэнызы, но веразы, кызьы ужало соосты мерлыко вотэсъёсын вӧлмытон бордын.

«Арня ӵоже ини тодматӥськом финъёсты удмурт лулчеберетэн но «КУАРА» огинлэн уженыз, — гожтэ ВКонтакте вотэсбамаз Влад Степанов. —  Школьникъёс Богданлы синмасько — тужгес но пиналъёслы Пичи Пурга ёрослы сӥзем клип кельше. Школаосы сяна, библиотекаосы но вуылӥськом — отын фин пересьёс, ӵошен люкаськыса, пӧртэм ужрадъёс ортчытъяло. Арлыдоос, пиналъёсын ӵошатыса, мыло-кыдоесьгес. Огпол, возьдаськонзэс вормыса, веразы: «Огиндылэн ужез туж пайдаё культураез но кылэз азинтон понна».