Удмуртиын ялӥзы «Нылкышно ке шуисько…» фотовожвылъяськон

Конкурс гуртын улӥсь кышномуртъёс понна ортчытӥське.  Кузьымъёс гуртъёсын тыршись ужбергатӥсьёс дасялозы. Со сярысь ивортэмын «Удмурт нылкышно кенешлэн» вотэсбамаз

15-тӥ коньывуонэ гуртын улӥсь кышномуртъёслэсь дунневыл нуналзэс пусъйизы. Ӟечкыласа нылкышноосты но апай-кенакъёсты нимысьтыз тӥ фотоконкурс радъяське.

Куронъёс:

• Лэсьтэ яке быръе гурт улондэс возьматӥсь туспуктэмдэс.
• Поттэ сое вотэсбамады но #нылкышнокешуисько #удмуртнылкышнокенеш хештегъёсты пуктэ

Вожвылъяськонлэн кык номинациез:
1-тӥ номинация — «Гуртын уж пӧзе». Татчы возьмаськоло гуртын быдэсъяськись ужъёслы сӥзем туспуктэмъёстэс: ӧнер удысады, бакчаын, пудо-живот котырын но трос мукетсэ
2-тӥ номинация — «Ял короме!» Таяз номинациын витё шутэтсконлы, шулдыръяськонлы, инкуазе потамдылы сӥзем туспуктэмъёстэс.

Вожвылъяськонэ гуртын улӥсь вань кышномуртъёс пыриськыны быгато. Котькуд номинациын куинь вормись луоз. Устооссэ жюри быръёз. Нош кузьымъёсты гуртъёсын азинскись ужбергатӥсьёс дасяло.

Нимысьтыз кузьым тужгес но трос «лайкъёс» люкам туспуктэм понна сётӥськоз.
Со сяна, устооссэ туспуктэмъёс «Удмурт нылкышно кенеш» огинлэн бамаз но «Удмурт дунне» газетэ поттэмын луозы. Конкурс 1-тӥ толсурозь кыстӥськоз