Удмуртиын улӥсьёс Пушкинэз анай кылын лыдӟонъя калыккуспо вожвылъяськонэ пыриськыны быгато
Лыдӟетъюрт пӧртэм кунъёсысь кылбуретэз дунъясь муртъёслы (14 ареслэсь бадӟымъёслы) вазиське. Лыдӟе Пушкинлэсь яратоно чуръёстэс анай кылыныды – ӟуч, бигер, удмурт, чуваш, мордва, коми, англи, немец, француз, азербайджан но мукет.
Ӟуч кылбурчилэн вордскемез дырысен 220 ар тырмонлы тупатэм вожвылъяськон Россиын но мукет кунъёсын улӥсь пӧртэм калыкъёсты сяме пырем дунлыкъёс – кылэз, литературая кылёсбурез, устооссэ вашкала йылолъёсты яратон — котырын огазеян но, вуоноез сярысь малпаськыса, лулчеберетъёслэсь творчествоя кусыпъёссэс юнматыны кулэ.
Вожвылъяськонэ пыриськон понна Пушкинлэсь произведенизэ анай кылын лыдӟемез видео гожтоно. Валтӥсез курон – кылбур каръёслэн но кунъёслэн история но лулчеберет ласянь пусйымон интыосазы гожтэмын луыны кулэ. Тужгес тупалозы кылбурчиен герӟаськем интыос, литературая музейёс, Александр Пушкинлы синпелетъёс.
Гожтэм ужъёсты 1-тӥ куарусёнозь куто. Куриськонэз но Ютубысь ролик вылэ чӧлсконпусэз inlit@uonb.ru электрон почтая келяно. Озьы ик видеороликез мерлыко вотэсъёсысь баме #PushkinLike, #ПушкинLike, #Пушкинлайк, #ВремяЧитатьПушкина хэштэгъёсын интыяно.
Вожвылъяськонлэн валатэтэныз (положениеныз) рос-просгес тодматыны татын луэ.
Ватсалом, Александр Пушкинлэсь кылбуръёссэ ӟучысь удмурт кылэ Ашальчи Оки, Максим Прокопьев, Гай Сабитов, Михаил Петров, Игнатий Гаврилов, Афанасий Лужанин, Роза Яшина, Владимир Романов но мукетъёсыз берыкъязы.