Удмуртиын улӥсь пор калыклэн Ӧтчамез ортчиз Ижкарын

Съезд кутскиз Россиысь сиё-дано суредасьлэн Иван Ямбердовлэн адӟытонэныз. Солэн «Марий кундем» нимын огазеям портретъёсыз но пейзажъёсыз сӥземын аслаз пор шаерезлы.

Делегатъёсты но куноосты пумитазы элькунысь йӧскалык политикая министр Лариса Буранова, элькунысь лулчеберетъя но туризмъя министрлэн воштӥсез Пётр Данилов, Марий-Элысь лулчеберетъя, печатья но йӧскалык ужпумъёсъя министрлэн воштӥсез Галина Ширяева но Россиысь поръёслэн йӧскалык лулчеберетъя федерал огазеяськонзылэн тӧроез Лариса Яковлева.

Удмуртиысь пор огазеяськонлэн ужамез сярысь вераз солэн кивалтӥсез Анатолий Радыгин. Со пусйиз, Удмуртиын 9,5 сюрс поръёс уло. Соос пӧлысь 3,8 сюрсэз – каръёсын, 9,5 сюрсэз — гуртъёсын. Туннэ поръёс, элькунысь мукет выжы калыкъёсын ӵошатыса, тужгес но трос лыдъясько. Соосты азьпалто ӟучъёс, удмуртъёс, бигеръёс но украинъёс гинэ. Каракулино, Грак но Алнаш ёросъёсын пор калык уката но трос интыяськемын.

Анатолий Ильичлэн верамезъя, сяме пыӵазы ини таӵе ужрадъёс: «Семык» шулдыръяськон, пор кырӟанъёсты быдэстӥсьёслэн вожвылъяськонзы, пор лулчеберетъя элькун фестиваль. Нимысьтыз пусйымон И.М. Токмурзин-Ломберский, И.П. Радыгин, В.Е. Бельский пор югдытӥсьёсты буре ваён ужрадъёс.

Съездын уж мынӥз 3 секциосъя: «Марийское общественное движение Удмуртской Республики: перспективы развития», «Этнокультурное образование» но «Молодежные инициативы: от идеи до реализации проекта».

Ӧтчам йылпумъяськиз Марий-Элысь вуэм коллективлэн концертэныз.