Удмуртиын Мусколы сӥзем нуналъёс радъяськозы

Кык нуал ӵоже Муско Кивалтэтлэн делегациез пӧртэм ужрадъёсы пыриськозы. Программаязы одӥгез валтӥсь ужрад — «Новые возможности сотрудничества в сфере государственной национальной политики. Развитие стратегического партнерства и углубление межрегиональных связей» нимо котырес ӝӧк. Та пумиськон орточоз 11-тӥ инвожое Калыкъёслэн Эшъяськон юртазы.

Удмурт Элькунысь йӧскалык политикая министр Л.Н. Буранова куноослы вералоз та удысын лэсьтӥськись ужъёс сярысь. Т.П. Боталова, Калыкъёслэн Эшъяськон юртсылэн кивалтӥсез, йӧскалык политика удысын ресурсной центр кылдытонэн тодматоз. Пусйны кулэ, таӵе центрез кылдытон кылем арын мытэмын вал. Соин ик лэсьтэм ужлы дунъет сётыны но пичияк йылпумъянъёс лэсьтыны луоз.

Котырес ӝӧкын озьы ик та удысысь лэчыт ужпумъёсты сэрттозы-пертчозы, улосъёс асьсэлэн опытэнызы тодматозы. Со сяна Удмурт Элькунысь йӧскалык политикая министерство но Калыкъёслэн Эшъяськон юртсы асьсэлэн ӵектосъёсынызы тодматозы.

«Новые возможности сотрудничества в сфере государственной национальной политики. Развитие стратегического партнерства и углубление межрегиональных связей» нимо котырес ӝӧклэн йылпумъянэз луоз Удмуртия но Муско куспын йӧскалык кусыпъёсты радъян удысын вачеужан сярысь ужкагаз гожтон.