Удмуртиын йӧскалык политикаез улонэ пыӵатон сярысь вераськизы

Ужрад Волга котырысь каръёслэн огазеяськонзылэн кичӧлтэмез улсын ортчиз. Пумиськонэ Уфаысь, Тольяттиысь, Нижний Новгородысь, Пермысь но мукет каръёсысь мерлыко огазеяськонъёслэн ёзчиоссы но ёзэсъёсысь валтӥсь специалистъёс вуизы.

Удмуртиысь йӧскалык политикая министерстволэн ужаменыз, элькунамы ужась лулчеберетъя йӧскалык огаезяськонъёслэн проектъёссы сярысь, кылъёсты утён бордын пуктэм уж сярысь йӧскалык политикая министерстволэн кивалтӥсезлэн воштӥсез Людмила Соковикова тодматӥз.

Удмуртиысь Калыкъёслэн эшъяськон юртсылэн ӵектосъёсыныз, ужан ӧръёсыныз, мерлыко вотэсъёсын уж нуэменыз сярысь ужъюртлэн кивалтӥсезлэн воштӥсез Татьяна Фёдорова тодматӥз.

Удмурт кылэз утёнэн герӟаськем ӵектосъёс сярысь удмурт егитъёслэн «Шунды» огазеяськонзылэн тӧроез Алина Чернова ивортӥз. Со люкаськемъёслы «Шундыкар», «Вамыш», «Тулкым» лагерь сменаослэн ужамзы сярысь вераз. Грантъёс утэмзылы луыса «Моко но Боко» мультфильмъёс, нылпиослы дышетӥсь ӝӧквыл шудонъёс, «Шудком» ӵектос сярысь мадиз.

Озьы ик ас огазеяськонъёсазы уж нуэмзы сярысь ивортонъёс лэсьтӥзы еврейёслэн лулчеберетъя центрзылэн кивалтэтэзлэн ёзчиез Валерий Сентяков но армянъёслэн «Урарту» мер огазеяськонзылэн тӧроез Мнацакан Аракелян.

Башкириысь Уфаысь Расим Султангареев йӧскалык воскресной школаос сярысь вераз. Туннэ карын 3 сыӵе школаос ужзэс нуо. Отын бадӟым саклык висъяське пиналъёсты историен, литератураен, лулчеберетэн тодматонлы. Нылпиос асьсэды элькун, росси но калыккуспо конкурсъёсын, конференциосын, адӟытонъёсын умой возьмато.

Со сяна, ас каръёсазы ужан амалъёсынызы Поволжьеысь каръёслэн ассоциациязы пырись каръёсысь ыстэм муртъёс тодматӥзы.

Контентмейкер, мемолог и журналист

Дом Дружбы народов
Добавить комментарий