Удмуртиын гурт лулчеберетъя «Гурт-fest» калыккуспо фестиваль ортчоз

Фестивале Удмуртиысь, Россиысь но кунгож сьӧрысь гуртъёсысь фольклор коллективъёс, музейёслэн творчествоя коллективъёссы, калык крезьгуро инструментъёсты лэсьтисьёс, «этно» но «фолк» ӧръёсъя кырӟасьёс, чеберлыко киужъёсъя центръёс, гурт возёсын сиён-юон поттӥсьёс, фермер возёсъёс пыриськозы.

Лудорвайлэсь котырес лыдпуссэ пусъён Чечы спасэн тупа, соин ик татын чечыез вӧсян, сое веръян но вузкарон ортчоз.

«Гурт-fest» улсын ик «Развитие и продвижение сельского и событийного туризма в Удмуртии» нимо котырес ӝӧк ужалоз.

Куноосты шулдыртозы гала-концертэ пыриськись артистъёс: Санкт-Петербургысь волынкаен но барабанъёсын шудӥсьёс, Великий Новгородысь «Круговина», Эстониысь сету группа, «Брангуртысь песянайёс», Глаз ёросысь «Пестро саес», Кияса ёросысь «Инвожо», «Вербное воскресение», Анастасия Вершинина, Ирина Шихалева, шер пумиськылӥсь инструментъёсын шудӥсьёс Владимир Шкелёв но Анатолий Лукин, Ирина Пчеловодова, Алексей Кузнецов, Вероника Фёдорова, Анатолий Добряков, калык эктонъя «Чебеляй» студия, музей-заповедниклэн «Лудорвай кенакъёс» фольклор ансамблез.

Калыккуспо фестивальын гурт азбаръёсты учкыны луоз: шор ёросъёсын улӥсь удмуртъёсын тодматоз Дэри ёросысь Пероггурт, лымшор удмуртъёсын — Кияса ёросысь Салья гурт, уйпал удмуртъёсын — Глаз ёросысь Золотари гурт, Эстониысь куноос сету калыкен тодматозы, ӟуч гуртэз возьматозы Сарапул ёросысь Юрино но Дэбес ёросысь Смольники гуртъёс, бигер гуртэз — Балезино ёросысь Кестым гурт но бесермян гуртэз — Яр ёросысь Вортча гуртын улӥсьёс.

Калык йылолъёс вылэ пыкиськыса лэсьтэм дӥськутъёссэс возьматозы Зоя Лебедева, Татьяна Маштакова, Полина Кубиста но Олег Ажгихин.