Удмуртиын чебераез – «Мисс Эктоникаез» быръёзы

Тужгес чебер нылашез быръёнъя конкурс 90-тӥ аръёсы кылдӥз. Бӧрысь вожвылъяськонэз радъян борды мерлык басьтӥськиз – «Дэмен» огазеяськон трос аръёс ӵоже «Чебераез» радъяз. Вожвылъяськонэз шоу карон понна трос кужымез но дырез жалятэк сётоно луылӥз. Аръёс ӵоже тыршем юнме ӧз ортчы — конкурслэн ӟечлыкез шӧдскымон будӥз.

«Вожвылъяськонэ нылъёсты дасян понна ми бадӟым специалистъёсты ӧтиськом вал ини, – тодаз вае «Дэмен» огазеяськонлэн азьвыл тӧроез Андрей Ураськин. —  Соосын стилистъёс, хореографъёс, вокалистъёс ужазы. Сцена вылын котькудӥз ассэ йӧно возьматыны мед быгатоз шуыса».

Анастасия Тутаева — Элькунысь берпуметӥез чеберай. 2014-тӥ ар бере вожвылъяськон элькун инлыкен огпол но ӧз ни ортчытъяськы. Анастасия ӟеч сямез улӟытонлы ачиз но дурбасьтэ. Со огшоры шоу ӧвӧл. Бадӟым сцена вылэ потон, вожвылъяськонын вормон улонын астэ шедьтыны юрттэ.

«Конкурсэ пыриськеме юрттӥз азьпалан кужым шедьтыны, — шуэ Анастасия. — Тани сцена вылэ потэме бере бадӟым проектъёс борды басьтӥськыны быгатӥ. Аслым оскыны дыши, оскыны быгатӥ бере, «Мынам Удмуртие» телерадиокомпание но ужаны лыктыны дӥсьти».

Туэ «Чеберай» Ижкрын «Мисс Эктоника» ним улсын ортчоз. Отчы быдэс шаерысь нылашъёс пырисько ке но, вожвылъяськонлы элькун инлык сётыны шуг. « Мисс Эктоникалэн» аслаз шӧмыз, аслаз куронъёсыз, аслаз интыез.