Удмуртиын бигер нылкышноослэн Союззылэн форумез ортче

Форуме пыриське Татарстанысь бигер НКО-лэн делегациез но. Соин кивалтэ дунневылкуспо «Ак калфак» огазеяськонлэн тӧроез Кадрия Идрисова.

Форуме люкаськемъёс Балезино ёросысь Падера гуртэ вуылӥзы. Отын соосты «Очрашу» ансамбльысь артистъёс пумитазы. Собере активистъёс чупчи бигеръёслэн улэм-вылэменызы интерактив амалъя дасям музейын тодматскизы но «Комната советского периода» экспозициез учкизы.

Нош Кестымын форуме пыриськисьёс «Татар Йорты» школа музее ветлӥзы, мечете пыразы, Касимовъёслэн(гуртын тужгес но вӧлмем фамилия) выжыенызы тодматскизы, курикен керттӥськонъя но пужъятӥськонъя мастер-классэ пыриськизы.

Кестымысь лулчеберетъя юртын куноосты пумитаз элькунысь уйпал ёросъёслэн имам-мухтасибзы Ильмир Касимов, «Балезино ёрос» муниципал кылдытэтысь депутат кенешен кивалтӥсь Николай Бабинцев, озьы ик интыысь артистъёс.

Ватсаса: 7-тӥ толсуре форуме люкаськемъёс Калыкъёслэн Эшъяськон юртазы пумиськылӥзы. Йӧскалык кусыпъёсты юнматон ужпумлы сӥзем проектъёсын тодматскизы. «Ак калфаклэн» ёзчиосыз  анай кылэз утёнъя, сое дышетыны луонлыкъёс кылдытонъя но нылпиосты семьяын будэтонъя ужан амалъёсынызы тодматӥзы.