Удмуртиын «Анаелы гожтэт» вожвылъяськон ялэмын

29-тӥ шуркынмонэ Россиын пусйиське Анайлэн нуналэз. Нош 27-тӥ шуркынмонэ удмурт кыллэн нуналыз. Соин валче «Удмурт нылкышно кенеш» «Анаелы гожтэт» акция ялэ.

Елена Миннигараева, «Удмурт нылкышно кенеш» огазеяськонлэн кивалтӥсез:

Та дуннеын котькудӥзлэн вань анаез. Ӟеч-а со, урод-а, вала-а тӥледыз, уг-а, вӧзады-а, улонысь кемалась кошкиз-а ни — анай сярысь малпанъёс сюлэммылэн тужгес пыдлось сэрегаз уло. Со сяна, удмуртъёслэн Анай но Анай кыл валатонъёссы туж юн ог-огенызы герӟаськемын. Анай кыл пиналлы анай йӧлын пыӵа, озьы ик быдэс улонэзлы кытын ке пыдлон сюлэмаз кыле.
Акцие пыриськисьёслы ми дэмласьком мусо, дуно анайёссылы гожтэт гожтыны, вераны, макем соос ярыто анайёссэс, макем дунъяло. Кин ке, оло, кемалась верано кылъёссэ шараялоз.

Акцие пыриськыны быгато вань мылкыд карисьёс, нылпиос но пенсионеръёс но. «Анаелы гожтэт» гожтыны луэ улонысь кошкем анайлы но. Кыӵе кылъёс верасалды солы? Мар сярысь ӧпкелиськоды?

«Анаелы гожтэт» акцие пыриськон понна гожтэмдэс асьтэ вотэсбамады интыялэ, улӥяз #Анаелыгожтэт #Удмуртнылкышнокенеш хештэгъёс пуктэ.

Устоосыз ужъёс пуктэмын луозы «Удмурт нылкышно кенешлэн» вотэсысь Вконтакте но Инстаграмм группаосаз. «Удмурт дунне» газетын печатласькозы.