«Удмуртия» издательствоын М. Гариповлэн адӟытонэз усьтӥськиз
— Менсадык Гариповлэн та ужъёсыз — издательствоямы кыллись оригиналъёс. Соос дорымы утисько 1986-тӥ арысен, — пусйиз «Удмуртия» издательстволэн директорез Юрий Кузнецов. — Та ужъёс быдэс Совето Союзэз ортчемын, пусъемын РСФР-ысь, СССР-ысь госиздатъёслэн дипломъёсынызы. Соос чебертӥзы удмурт выжыкылъёсын книгаез — авторъёсыз Надежда Кралина но суредась Менсадык Гарипов УАССР-ысь кун премилэн лауреатъёсыз луизы.
Юрий Васильевичлэн верамезъя, та 2 адямиос «Удмуртия» издательстволэн улоназ туж мур пытьы кельтӥзы. Соин ик издательстволы 100 ар тырмонэн герӟаськем ужрадъёсыз та адӟытон бордысен кутско.
Адӟытонэз усьтонэ пыриськизы Менсадык Гариповлэн но Надежда Кралиналэн ӵыжы-выжыосыз но тодмо суредасьёс, журналистъёс. Уноез соос асьсэ тодэ ваёнъёсэс мадизы.
Юрий Кузнецов тодэ вайытӥз: Менсадык Гариповлэн данэз нырысь ик шуккиськиз быдэс Россие, со РСФСР-ысь дано суредась луиз, солэсь выжыкылъёсъя суредъёссэ Третьяковской галереяя басьтӥзы. Та бӧрсьы гинэ Удмуртиын солы калык суредась ним сётэмын вал.
«Удмуртия» издательствоын Менсадык Гариповлэн ужъёсыныз адӟытон ужалоз туэ октябрь толэзёзь.