Удмуртилэн Тӧроез А. Бречалов Гракысь музейлы тодмо удмурт кылбурчилэсь, врачлэсь Ашальчи Окилэсь документъёссэ кузьмаз.
«Ми понна тужгес дуно Лина Григорьевналэн ас киыныз гожтэм биографиез, — шуиз М. Козлов. — Сое со 49 аресказ гожтэм. Документэз лыдӟыса адӟиськод, макем Лина Григорьевна визьмо вал, гожтэмаз одӥг янгышез но, одӥг мултэсэз но ӧвӧл, лад-лад, рос-прос, чебер кылын гожтэмын. Со репрессия улэ шедьыса, кӧня ке пол пытсэт сьӧры келяллямын вал. Но та пумысен ӝожтӥськон кылыз-мылкыдыз чик уг шӧдӥськы. Быдӟым тылож кутскем дырысен 2 нунал гинэ ортчыса, Лина Григорьевна ачиз куриськыса, войнае кошкиз. Кӧня адямиослэсь улонзэс утиз, дораз 1946-тӥ арын гинэ берытскиз. Но документъёсын одӥг чур но та сярысь со уг вера, собыдӟа ӟеч лэсьтэм уженыз уг данъяськы».
Та нуналъёсы нырысетӥ удмурт кылбурчилэн документъёсыз поттэмын луозы Грак ёросысь Ашальчи Окилэсь нимзэ нуллӥсь музейлэн сайтаз.