Удмуртие люкаськозы ӧжыт лыдъем выжы калыкъёс

Форуме пыриськыны мылкыд каремзэс веразы ини 40-лэсь трос адямиос – со бесерман, ханты, челкан, долган, ненец, эвнек, саам, шорц, абазин, нагайбак калыкъёслэн оскем муртъёссы.

Егит азьветлӥсьёс мастер-классъёсы, кенешонъёсы пыриськозы, экскурсиосы ветлозы. Вера Ижкарысь Калыкъёслэн Эшъяськон юртысьтызы ӧнерчи Ольга Тронина:

«Ужалозы трос площадкаос. Отын люкаськемъёс ас кылзэс шаеразы утён, азинтон вылысь ужась проектъёсын тодматозы, ужан амалъёссы сярысь вералозы. Со сяна чакламын нимысьтыз площадка, кытчы вань мылкыд карисьёс лыктыны но со калыкъёсын тодматскыны быгатозы».

Форумлэн 2-тӥ нуналэз ортчоз Юкаменск ёросысь Шамардан гуртын. Отын тодматскозы бесерман калыклэн улэм-вылэменыз: лулчеберетэныз, сям-йылолъёсыныз, фольклореныз.