Удмурт югдытӥсьлы Максим Прокопьевлы сӥзем конференци ортчоз 2019-тӥ арын Башкириын

Максим Прокопьев туала Башкириысь Каймашбаш но туала Пермь улосвылысь Вылӥ Гондыр удмурт гуртъёсысь земской школаосын дышетӥсь луыса ужаз.

Кызьы вераз Камсьӧр удмуртъёслэн йӧскалык центрзылэн тӧроез Флюра Чибышева, кенешонын арлы йылпумъянъёс лэсьтӥзы но кайталы ужанрадлыкез юнматӥзы. Максим Прокопьевлы сӥзем конференци сяна, 2019-тӥ арын Башкириысь Янаул ёросын удмурт нылашъёс пӧлын «Чеберай» улосвылкуспо вожвылъяськон ортчоз. Та дырозь конкурс элькун инлыкен радъяськиз, нош вуоно арын нырысьсэ пӧртэм интыосысь удмуртъёсты люкалоз.

Арлы йылпумъянъёсъя но кайталы ужанрадлык кылдытонъя кенешон Удмурт кун университетын ортчиз. Отчы Россиысь 7 улосвылъёсысь удмурт йӧскалык огазеяськонъёслэн кивалтӥсьёссы но азьветлӥсьёссы пыриськизы.

Ватсалом, пумиськонэз «Выль ар саламъёс» концерт йылпумъяз. Люкаськемъёсты Удмуртилэн палэназ улӥсь егит удмуртъёс шулдыртӥзы.