Удмурт театрын усьтӥськиз выль пичи зал

— Туннэ асьмелэн корка пырон, — постановкаез учкисьёслы вераз Удмурт театрлэн кивалтӥсез Андрей Ураськин. — Та пичи залэз лэсьтон сярысь малпан вал ини быдэс театрез выльдыны кутскем дырысен. Но малпанэз пумозяз вуттон понна трос дыр кулэ луиз.

Андрей Ивановичлэн верамезъя, залэз учкисьлы кельшымонгес карон понна уж азьланяз но мыноз на. Кылсярысь, лэсьтӥськозы пандусъёс. Но оглом зал кельшымон пӧрмем. Отчы 40-50 учкись тэре. Та пичи заллы туж тупалозы нимысьтыз постановкаос, моноспектакльёс, кылбур ӝытъёс. Сӥзьыл татын дасяны кутскозы нырысетӥ пьесаез.

Андрей Ураськин оскемзэ вераз, выль сцена ноку буш уз луы, татын ялан ужалозы артистъёс, творчество удысысь адямиос. Кылсярысь, берло дыре туж ӧжыт удмурт поэзилы сӥзем ӝытъёс. Нош та залын соосты тросгес но ӟечгес но радъяны луысал.

«Кылбурен валче вамышъяса» нырысетӥ постановка туж шуныт пӧрмиз. Артистъёс удмурт кылбурчиослэсь чуръёссэс лыдӟизы, кырӟанъёссэс быдэстӥзы. Егит сценарист но режиссёр Константин Ложкин быръем совето вакытъёсысь кылбурчиослэсь но, туалаосызлэсь но чуръёссэс. Соосты огазе биньыса, аспӧртэм сценарий гожтэм. Чузъяськизы А. Бутолинлэн, Д. Яшинлэн, Г. Ходыревлэн, Н. Байтеряковлэн, Т. Черновалэн, М. Федотовлэн, Б. Анфиногеновлэн, П. Захаровлэн но мукет кылбурчиослэн чуръёссы.

Постановкаез 3 люкетлы висъяны луысал. Нырысь ик, егит пиос но нылъёс вискын аспӧртэм кылбур батл. Артистъёс яратон, шаер, инкуазь но мукет темаосъя кылбуръёс лыдӟо, тодмо удмурт кырӟанъёсты быдэсто. Адӟытонлэсь крезьгурзэ дасяз но баянэн шудӥз И. Котельников. Тужгес тунсыко пӧрмем постановкалэн 2-тӥ люкетэз. Татын егитъёс вискын яратон кусыпъёс возьматэмын. Ӵемысь — лякыт ирония пыр, шудыса-мусояса кадь. Нош постановкалэн 3-тӥ люкетэз сӥземын ни семьялы, вордӥськем музъемлы, огъя удмурт шаерлы. Татын тужгес шӧдӥське совето вакытысь романтизм.