Удмурт стендап клуб усьтӥське Удмуртиын

«Нырысетӥез пумиськон ортчоз «эрико микрофон» форматъя. Ужрадэ котькин но пыриськыны быгатэ. Асьсэдыз стендап жанрын эскерыны мылкыд карисьёс пумен люкасько ни, та дырлы дасо пала адями ни», — вера Александр Бикузин, удмурт стендап клубез радъясь.

Серемес мадёсъёсын микрофон азе потыны Шаркан, Алнаш, Эгра ёросъёсысь егитъёс дасясько.

«Стендапен маскаръяськыны мылкыд каризы арлыдогес улосчиосмы но. Кылсярысь, кырӟасьлэн Андрей Корниловлэн атаез Вячеслав Корнилов озьы ик мылкыд кариз улонысьтыз серемес учыръёсыз сярысь вераны. Озьы ик пыриськозы студентъёс», — азьланьтэ Александр Бикузин.

Солэн верамезъя, стендап клуб толэзьлы быдэ люкаськылоз. Азьланяз ог 5-10 маскарчиосын концерт но возьматыны малпанъёс вань.

«Туннэлы удмурт сцена вылын стендап жанрен ужась артистъёс ӧвӧл, маскарчиосты но, Вячеслав Цветной сяна, бадӟым сцена вылысь адӟыны уг луы. Удмурт стендап клуб, оскиськом, юморын выль кизилиосты усьтоз», — шуэ Александр Бикузин.

Нырысетӥез пумиськон «Пужей» ресторанын ортчоз. Пыронэз 100 манет. Александр Бикузин верамъя, люкам коньдонэз устоез комик басьтоз.

https://udmurt.media/udm/news/monporazhyen/66294/