Удмурт шудонъёс кылдозы «Кико» лабораториын
«Артэ» огазеяськонлэн бурд улаз Алнаш ёросысь Усо школаысь пиналъёс «Кико» проектсэс гожтӥзы. Сое улонэ пыӵатон понна Росмолодёжь агентстволэсь грантсэ утӥзы.
Усо школаысь пиналъёс шугъяськонэн пумиськиллям: ӵош дышетскись эшъёссы школа улонэ мыло-кыдо уг пырисько, трос дырзэс гаджетъёсын ортчыто, удмурт лулчеберетлэсь палэнско.
Таин нюръяськон понна пиналъёс малпазы удмурт кылын онлайн-шудонъёсты кылдытыны. Со понна уже кутӥзы «Кахут», «С++», Learningapps.org платформаосты. Али пиналъёслэн 5 онлайн-шудонзы дась ини. Кызьы верало усоос, табере соос ваньмон дыръязы выль шудонъёсты гинэ ӝуатъяло.
Нош утэм грант улсын удмурт кылын шудонъёсты лэсьтонъя быдэс лаборатория кылдоз. Отын дышетӥсьёс но пиналъёс трос выль тодон-валан люканы быгатозы.