Удмурт пиналъёс понна «Усточикар» лагерь ӧсъёссэ усьтоз 1-тӥ гудырикошконэ Башкириын
Лагере Башкириысь, Пермь шаерысь но Удмуртиысь 100 нылъёс по пиос люкаськозы. 10–16 аресъем пиналъёс куать ӧръёсъя тодон-валанъёс басьтозы, со пӧлын сяме пыӵам эстрада, фольклор, кызьпу туй, журналистика, театр ӧръёс, туэ нырысьсэ ватсаськиз дӥськут дизайн.
«Усточикаре» шедьыны мылкыд карись пиналъёс котьку трос луо, туэ 300–400 пала куриськисьёс вал, куд-огез нылпиос вить-куать пол но ветло.
«Туэ туж бадӟым конкурс, — вера «Усточикарлэн», озьы ик Башкириысь Историяя но лулчеберетъя удмурт центрлэн кивалтӥсез Ирина Самигулова. — Милям тазьы лэсьтӥське ужмы: сентябрь толэзе вераськиськомы, мыноз конкурс быдэс ар школаын, собере дышетӥсьёс, школаысь администрация быръё асьсэ школаысьтызы тужгес усто пиналзэс та ӧръёсъя. Школа сётэ ини со пиналъёслэсь списоксэс. Та пиналъёс пӧлын луо элькун олимпиадаосын, пӧртэм ужрадъёсын вормисьёс, азьветлӥсьёс — пиналъёс, кудъёсыз маин ке но выро, мае ке но быгато, маин ке но паймыто школазэс».
Пиналъёсын ужасьёс пӧлын тросгес Удмуртиысь ӧнерчиос.
«Инъетты тӥляд умой, тӥляд кужмо ӧнерчиосты трос, тӥ удмурт шаерын улӥськоды, ми кадь, Башкортостанын, «палдэм» удмуртъёс уд луиське, соин ик ми куриськом юрттэт. Котькуд ар милемлы Йӧскалык политикая министерство, «Удмурт Кенеш», егитъёслэн «Шунды» огазеяськонзы азямы лыкто. Туэ, но тани лыкто ми доры 5 ӧнерчиос — фольклор, эстрада, дӥськут дизайн, театр, журналистика, нош туен ужась луоз Пермь шаерысь», — валэктӥз лагерьлэн кивалтӥсез.
Лагерь 10 нунал ужалоз. Йылпумъяса котькуд отряд аслэсьтыз «емышсэ» возьматоз. Эстрада, фольклор ӧръёсы пыриськисьёс концерт дасялозы, театр отрядысь пиналъёс спектакль пуктозы, кызьпу туен вырисьёс адӟытон лэсьтозы, журналистъёс асьсэ гожъямъёсынызы, дизайнеръёс дӥськутэнызы тодматозы.