Удмурт нылпиослы «Нуныкай» ӵектослэн нырысетӥ люкетэз йылпумъяськиз Удмуртиын

    Удмурт нылпиослы «нуныкай» ӵектослэн нырысетӥ люкетэз йылпумъяськиз удмуртиын 1

    Кыккылолыкъя «Билингва» центрлэн семинараз тросэз анай-атайёс пусйизы: туж умой, удмурт нылпиослы, анай-атайёслы тодматскыны сыӵе площадка кылдӥз шуыса.

    «Тросэз семьяос ог-огенызы эшъяськизы. Нылпиос табере занятиосын сяна но пумиськыло ог-огенызы. Со туж бадӟым плюс. Со сяна, туж зол мотивировать каро та занятиос»,- Татьяна Волкова, «Билингва» центрлэн кивалтӥсез, кылосбур тодосъя кандидат.

    Анай-атайёс пусъё, занятиос пыр нылпиоссылэн дунне валанзы паськыта шуыса. Трос умой кылъёс веразы ӧнерчиослэн ужамзы пумысен.

    Озьы ик анай-атайёслэн верамзыя, «Нуныкае» ветлыса, пиналъёссы удмурт кылэн но удмуртлыкен тунсыкъяськыны кутскизы: нылпиослэн занятиосы ветлэмзы потэ, удмурт кылын вераськемзы потэ.

    Ӵектослэн валтӥсь ужпумез — нылпиосты тросгес но ӵемгес удмурт кылын вераськытон — быдэстэмын шуыны луэ.

    «Билигнва» центрлэн кивалтӥсезлэн кылъёсызъя, тырмымтэос одӥг-кык гинэ чузъяськизы. Одӥгез соос пӧлысь дырен герӟаськемын вал: куд-огез пумиськонъёсты кӧснуналэ интые арня шорын ортчытъяны кулэ вылэм шуыса веразы.

    «Но ми лыдэ басьтӥськомы, кызьы милям ӧнерчиосмы быгато. Ми арня вискын тыршомы вуоно арын ужаны, одӥгзэ группаез ке но выжтыны арня вискы. Кызьы пӧрмоз, уг тодӥськы, но тросэз шуо, туж ветлэммы потэ, но кӧснунал уггес тупа: кинлэн ке тренировка, кинлэн ке песянайёссы доры бертыны кулэ. Тыршомы лыдэ басьтыны куронъёсты», — вераз Татьяна Волкова.

    Ӵектонъёс сярысь верано ке, одӥгез, кылсярысь, театр кружок усьтыны куронэн герӟаськемын вал. Татьяна Волковалэн кылъёсызъя, со пумысен малпаськонъёс вал ни, табере сое нуыны ӧнерчизы но шедьтӥзы ни. Озьы ик калык эктонъёслы дышетскыны мылкыд каро. Али ӧнерчиез утчаны кутскизы.

    Вераны кулэ, асьсэос анай-атаёс но удмурт кылэз вӧлмытон борды мыло-кыдогес басьтӥськизы.

    «Азьло анай-атайёс возьмало вал милесьтым ваньзэ, ужез радъялэ шуыса, нош ми пыриськомы. Нош али туж трос мылкыд каро асьсэос юрттыны милеем», — Татьяна Волкова, «Билингва» центрлэн кивалтӥсез, кылосбур тодосъя кандидат.

    Татьяна Волковалэн верамезъя, вуоно арын «Билигвалэн» нырысетӥ семинарез толсур пумын ортчозы, нош «Нуныкайлэн» занятиосыз тулыспалысен кутскозы. Али пиналъёсын люкаськылыны дунтэк инты шедьтымтэ на. Со ласянь кад администраци юрттоз, оло. Ӧз ке, анай-атайёс инты понна кӧня ке коньдон тыроно луозы — ог 150 манет.

    Тодэ вайытом, 2017-тӥ арын «Нуныкай» центр кар конкурсын коньдон утыса ужаны быгатӥз. Нош 2018-тӥ арлы Росси азьмуртлэн фондысьтыз грант басьтӥзы. Ӵектос «Удмурт Кенеш» огазеяськон юрттэм улсын кылдытэмын.

    ИА «Удмуртия»