Удмурт нылпиослы кык ӝоквыл шудон поттӥзы Ижкарын
Удмуртиысь егитъёслэн «Шунды» огазеяськонзы удмурт нылпиос понна кык ӝӧквыл шудон поттӥз.
«Шудком: шудыса дышетскиськом» проектлэн одӥгез блокез — ӝӧквыл шудонъёс. Ми «Удмуртия» издательствоен поттӥмы кык шудон. <…> Сыӵе яркытэсь потӥзы ини тани нырысетӥ емышъёсыз проектмылэн», — вера Алина Чернова, удмурт егитъёслэн «Шунды» огазеяськонзылэн тӧроез.
Одӥгез шудон – «Липет- кампет», со 5-7 аресъем нылпиослы визьнодась шудон. Отын суредъёс но кылъёс сётэмын, соос борды рифма малпаны кулэ. Кыкетӥез – «Кучыран», 5-8 аресъем пиналъёслы кылъёсын шудон. Татын дась слогъёслэсь кылъёс пӧрмытыны кулэ.
Алина Черновалэн верамезъя, та шудонъёсты малпаз «Удмуртия» издательствоысь дышетон литературая ёзэтлэн кивалтӥсез Татьяна Воронова, суредъёсты лэсьтӥз егит суредась Александра Гладыш, чеберлыкъя редакторез – Юрий Лобанов.
Матысь дыре та шудонъёс Удмуртиысь но мукет улосвылъёсысь удмурт пиналъёс доры вуозы, оскытӥз «Шунды» огазеяськонлэн тӧроез.
«Тиражзы котькудӥзлэн 2 сюрс 200, но издательство поттӥз на ай кӧня ке асьсэлы, соос быгатозы сое вузаны нылпиослы, анай-атайёслы, нош ми та тиражмес ваньзэ келяськомы гуртъёсъя — отын библиотекаосъя, нылпи садъёсъя. Озьы ик камьсӧр удмуртъёслы, диаспораослы – Башкирие но, Пермь о-о, кытын огазеяськонъёс вань, Екатеринбург гожтӥз вал курон, Киров улосвыл, Татарстан. Тыршомы, мед соосты адӟозы шуыса трос адямиос», — вера Алина Чернова.
«Шудком: дышетскиськом шудыса» ӵектослэсь эшшо кык люкетсэ быдэстыны кулэ на.
«Али дасяськомы мультфильм. Со Лия Малыхлэн выжыкылэзъя: «Боко но Моко» — кык корка кузёос, соослэн отын улэм-вылэмзы, приключениоссы, шуом, туж мусо но чебер пӧрмыны кулэ. <…> Андроид-приложение нылпиослы удмурт кылэз дышетон понна. Ужа Гриша Григорьев таиз бордын», — вераз Алина Чернова.
Тодэ вайытом, 2017-ттӥ арын удмурт егитъёслэн «Шунды» огазеяськонзы «Шудком: шудыса дышетскиськом» ӵектосэныз Росси азьмуртлэн грантъёсъя фондысьтыз «Йӧскалык но вӧсьлык кусыпъёсты юнматон» ӧръя 2 миллион 874 сюрс 755 манет утӥз.