Удмурт нылкышно кенеш анай кыллэн калыккуспо нуналэз улсын пумиськонъёс радъя

Валтӥсь ужпумзы – ёросъёсысь покчиосын ужасьёс удмурт кыллы дышетон удысазы тросгес ӧнерчиосты но анай-атайёсты мед кыскозы. Кемалась ик ӧвӧл пумиськонъёс ортчизы Глазкарын но Глаз ёросысь Штанигуртын.
 
Вера огазеяськонлэн тӧроез Надежда Степанова: «Ижкарын кемалась ужа ини «Зарни бугор» клубмы. Солэн ёзчиосыз юртто «Пичи чеберайёс но батыръёс», «Выжы-выжы-выжыкыл» фестивальёсмес ортчытыны.

Мылкыдмы вань – сыӵе клуб мед ужалоз Глазкарын но. Со нылкышноослэсь асваланзэс ӝутонъя, удмурт движение валтӥсь клуб мед луоз».

Азьланьтӥське озьы ик огазеяськонлэн анай кыллэн нуналэзлы сӥзем эшшо одӥгез кичӧлтонзы. «Удмурт нылкышно кенеш» ӵектэмъя, ёросъёсысь школаосын дышетскисьёс удмурт кыллы сӥзем сочинениос гожтозы. Ужъёссэс, кылъя дышетӥсьсы сяна, жюри но дунъялоз.
 
«Анай тусо, анай кыло» нимо сочинениосъя конкурс 5-тӥ классын дышетскись пиналъёс куспын мыноз, — азьланьтэ Надежда Степанова. – Сое ортчытыны мылкыд каризы пичи пургаос. Отчы Пургалы матысь ёросъёсты но кыскыны малпаськом — Кияса но Дэри ёросъёсты. Йылпумъянъёс лэсьтомы южтолэзе»