«Удмурт нылкышно кенеш» 25 ар тырмонэзлы форум ортчытӥз

Огазеяськонлэн 25 ар тырмонэзлы сӥзем ужрадэ 25 делегаци вуиз – Удмуртиысь каръёсысь но ёросъёсысь ёзэтъёслэн азьветлӥсьёссы, озьы ик Башкортостанысь удмурт нылкышноослэн «Эшъяськон тугоко» клубзылэн ёзчиосыз.

Туала вакытэ «Удмурт нылкышно кенеш» бадӟымгес саклык висъя семьяын удмурт кылэз утён ужпумлы. Нош сое быдэстон ӵапак нылкышно, анай, бордысь потэ.

«Асьме нылкышноосмы но кӧня ке шарагес мед кылӥськозы, элькунамы, фин-угор дуннеямы тросгес мед пыриськыны быгатозы, малы ке шуоно кышномуртлэн мылкыдыз, сюлэм шунытэз котьку но бурдъя воргорнъёсты. Малпасько тросэз шуг-секытъёсты сэрттыны-пертчыны луэ, куке вӧзын вань сыӵе зэмос, малпаськись, визьмо, чебер нылкышноос», – вераз «Удмурт кенеш» огазеяськонлэн тӧроез Татьяна Ишматова.

25 ар куспын “Удмурт Нылкышно кенеш ” огазеяськонлэн кичӧлтэмезъя пӧртэм ӵектосъёс улонэ пыӵатэмын. Нимысьтыз висъямон тодмо но яратоно луэм “Пичи чеберайёс но батыръёс”, “Выжы-выжы-выжыкыл” нылпи фестивальёс.

Нылкышно кенешлэн мукетыз ужан амалэз – со клубъёс кылдытон.Озьы 2016-тӥ арын огазеяськизы Башкириысь удмурт нылкышноос.

«Котькуд ортчись ужрадамы нылкышноосмы чебересь удмурт костюмъёсын лыкто, – шуэ Башкортостанысь историяя но культурая удмурт центрен кивалтӥсь Ирина Самигулова. – Соос чебер дӥськутсэс гинэ возьматыны уг лыкто, соос лыкто чебер ужзэс возьматыны, чебер ужлы дышетскыны, ог-огенызы люкиськыса, вераськыса азьланьын ужаны».

Форумын быдэс элькунын вӧлмытыны луоно тужгес тунсыко но пайдалыко ӵектосъёссы сярысь но вераськизы. Надежда Степановалэн кылъёсызъя, берло дыре нылпиослы чаклам ӵектосъёс бордынгес выро, нош даур кутсконын трос мерлыко проектъёссы вал, али соосты выльысь улӟытыны кулэ.

«2000-тӥ аръёсы ми ужамы трос социальной проектъёсын, али со туж валтӥсь лыдъяське. Кылсярысь, тани юрттон проектмы вал, кенешон проектмы,гурт нылкышноослы психологической юрттэт сётонъя, ӧнерчиосты гуртъёсы нуллӥськом вал. Солэн кулэлыкез вань. Сыӵе проектъёс но азинскыны кулэ кадь мыным потэ», – вераз  «Удмурт нылкышно кенеш» огазеяськонлэн тӧроез Надежда Степанова.

 

 

Поделитесь с друзьями:

Журналист, редактор сайта, руководитель и куратор медийных проектов, продюсер и ведущий интернет-телеканала "Даур ТВ"

Дом Дружбы народов
Добавить комментарий