Удмурт лулчеберетъя центрлэсь вуоно юртсэ эскеризы Ижкарын

Та дыре котькуд ӧрлы висъям интылэсь быдӟалазэ валаны кулэ, шуиз элькунысь Кун Кенешлэн депутатэз, «Удмурт Кенеш» огазеяськонлэн тӧроез Татьяна Ишматова:

«Ужпум одӥг — центрез пуктыны кулэ, со понна ӵектос кылдытыны кулэ, кызьы сое тупатыны, кытын, мае интыяны. Со понна тодыны кулэ, кыӵегес али юрт, кыӵегес солэн югдурез».

«Удмурт Кенешлэн» кивалтӥсез верамъя, табере лэсьтӥськисьёслы техзадание гожтоно. Соя ӧнерчиос ӵектос кылдытозы ни.

«Лэсьтӥськисьёс уг тодо, кӧня квадрат метр кулэ, кылсярысь, ательелы, кӧня квадрат кулэ кафелы но кытчы сое интыяны. Сое ваньзэ лэсьто со адямиос, кин выре, шуом ни, центрлэн пуштросэныз», — валэктӥз Татьяна Ишматова.

Озьы ик со пусйиз, В. Короленко нимо театрлэн азьвыл юртаз интыяськем «Айкай» театр Удмурт лулчеберетъя центрлэн шорсюлмыз луыны кулэ, соин ик юртын коллективлы нимысьтыз инты чаклано.

«Удмурт лулчеберетъя центрлэн шорсюлмыз луыны кулэ «Айкай» коллектив. Соин валче асьмелэн гожтэмын, «Айкай» но кулэ паськытгес ужаны шуыса, нылпи студия бордаз кылдытыны», — вераз «Удмурт Кенешлэн» тӧроез.

Тодэ вайытом, Ижкарын центрез усьтон пумысен кичӧлтон куартолэзе чузъяськиз. Гудырикошконэ «Удмурт Кенеш» солэсь учкетсэ дасяз. Нош коньывуонэ Удмуртилэн тӧроез Александр Бречалов огазеяськонлэн исполкомезлэн ёзчиосыныз пумиськылыкуз пусйиз, центр пумысен ужкагазъёс 2018-тӥ арлэн нырысетӥ ӝыныяз дась луыны кулэ. Соку вань ужъёсты Удмуртилэн кунлыкезлы 100 ар тырмонлы, 2020-тӥ арлы, быдэстыса вуттозы.

http://udmurt.media/udm/news/obshchestvo/28325/