Удмурт лулчеберетъя арня усьтӥськоз Можга ёросын

«Лулчеберетъя ужъюртъёсын пӧртэм ужрадъёс, адӟытонъёс, концертъёс, ӵектосъёсын тодматонъёс, мастер-классъёс, удмурт гожъясьёслэн творчествоенызы тодматсконъёс, удмурт сиён-юонъёслы сӥзем нуналъёс радъяськозы. Нылпи садъёсы ветлӥсьёс но школаосын дышетскисьёс удмурт праздникъёслэн историенызы, удмуртъёслэн йылолъёсынызы тодматскозы, монисто но утетъёс лэсьтыны дышетскозы» — гожтэмын пресс-службалэн ивортоназ.

5-тӥ оштолэзе «Дубитель» культура юртын быдӟым классъёсын дышетскисьёс понна фольклоръя «Бутьмар» калык ансамблен пумиськон радъяськоз. Карысь лыдӟиськонниос туала удмурт гожъясьёслэн творчествоенызы тодматонъёс дасязы. Нылпи лыдӟиськонниын Владислав Кирилловлэн творчествоезъя конференци ортчоз, нош Николай Байтеряков нимо лыдӟиськонниын — «Кенеш» журналлэн юбилеезлы сӥзем ужрад.

«Октябрь» культура юрт удмурт кырӟанэз яратӥсьёслэн ансамбленызы концерт дасяз, сое реабилитаци центрысь ветеранъёслы возьматозы. 7-тӥ оштолэзе шаертодонъя музейын «Азвесь» клублэн пумиськонэз ортчоз. Со нуналэ ик «Набат памяти» музейын фронтысь вуэм удмурт кылын гожтэтъёлы сӥзем вераськонэ пыриськыны луоз.

Тунсыко ужрадъёс чакламын 7 но 9 номеро дышетсконниосын, 4 но 9 номеро нылпи садъёсын.

Удмурт лулчеберетъя арня Можгаын йылпумъяськоз 7-тӥ оштолэзе. «Дубитель» культура юртын «Тень Алангасара» фильм возьматозы.