Удмурт лулчеберетъя арня кутскиз Удмуртиын 29-тӥ коньывуонэ
Удмурт лулчеберетэз азинтон но вӧлмытон ужрадъёс Удмуртилэсь кунлык нуналзэ пусъён, «Ночь искусств» акци но «Даур гур» фестиваль улсын ортчозы.
Котькуд муниципал кылдытэтын адӟытонъёс, мастер-классъёс, презентациос но мукет ужрадъёс ортчозы. Кӧня ке ёросъёсын «Одӥг нунал йӧскалык дӥськутэн» акци радъяськоз.
Дэри ёросын, кылсярысь, удмурт коркаысь арбериосын адӟытон ужалоз, Кизнер ёросысь Саркуз культура юртын трос пӧртэм удмурт ӵушконъёсын тодматозы. Эгра ёросысь Лудошур гуртын кут кутаны, сур пӧсьтыны, черсыны дышетозы. Дэбес ёросын удмурт калык выжыкылъёсты, мифъёсты но легендаосты шара лыдӟон радъялозы. Калык эктонэн вырись коллективъёс Сарапулын пумиськозы. Отын калык эктонъя «Камушка» элькун вожвылъяськон ортчоз.
Удмурт лулчеберетъя арня «Даур гур» IV элькун фестивальлэн одӥгез люкетэз луэ. Толсуре, берпуметӥ люкетаз, гала-концерт ортчоз но устооссэ программаосты возьматӥсьёсты пусъёзы.