Удмурт лулчеберетлы сӥзем нуналъёс ортчозы бускель улосвылъёсын

Удмурт лулчеберетлы сӥзем нуналъёс ортчозы бускель улосвылъёсын 1 Иворъёс

Удмурт лулчеберетлы сӥзем нуналъёс ортчозы бускель улосвылъёсын улӥсь удмуртъёс дорын. Таӵе ужрадъёс котькуд ар ортчыло кусыпъёсты тупатон но огазеян, палэнысь удмуртъёслэсь сюлэм шугъяськонъёссэс тодон но кылдэм ужпумъёссэс серттон-пертчон, пӧртэм ӵектосъёсты улонэ валче пыӵатон вылысь.

Таяз радэ пумиськонъёс чакламын Татарстанын, Башкорстостанын, Киров, Марий Эл но Пермь улосъёсын. Программа дасяське котькуд регионлы нимысьтыз, соослэсь мылкыдъёссэс, куронъёссэс но маин ке но кулэяськонзэс лыдэ басьтыса.

Ужрадъёс улсын удмурт кылэз но лулчеберетэз дышетон, утён но азинтон ужпумъёсъя котырес ӝокъёс, эктонъя но киужъёсъя мастер-классъёс, егитъёслы сӥзем площадкаос но трос мукет ужрадъёс радъяськозы. Нош йылпумъяськозы пумиськонъёс бадӟым удмурт концертъёсын. Удмурт лулчеберетэз возьматозы кырӟанъя но эктонъя «Айкай» кун театр, эктонъя «Чебеляй» студия но «Чипчирган» ансамбль.

Нырысетӥез пумиськон радъяськоз ини 18-тӥ шуркынмонэ Пермь шаерысь Бадӟым Гондыр гуртын.

Ужрадлэн радъясьёсыз: «Удмурт Кенеш» огазеяськон, Йӧскалык политикая министерство, Калыкъёслэн эшъяськон юртсы, Камсьӧр удмуртъёслэн центрзы но удмурт егитъёслэн «Шунды» дэменлыксы.

Поделитесь с друзьями:
Дом Дружбы народов