Удмурт лулчеберетлы сӥзем «Ерпечкаос» клублэн пумиськоназ Москваын 11 пиналъёс пыриськизы
«Тросэз клубе лыктэм пиналъёс «Герд» но «Удмурт бӧляк» огазеяськонъёсын ортчытъяськись ужрадъёсы мыло-кыдо пыриськисьёс. Нош кӧняез ке нылпиос, озьы ик анай-атайёс, кунлэн шоркараз кӧня ке ар ӵоже улытозязы улосчиосынызы нырысьсэ пумиськизы», — вера Лариса Марданова.
Удмурт кылъя урокез Людмила Нордгеймер ортчытӥз. Куд-огез пиналъёс удмурт кылэз нырысьсэ кылӥзы. Ог-огенызы удмурт сямен ӟечьяськыны дышетскизы, выль кылъёсты тодӥзы. Кун Думаын Удмуртилэсь депутат Алексей Загребин нылпиослы букварьёс но учебникъёс кузьмаз.
Пиналъёс дышетскытозь, клубез радъясьёс анай-атайёсын клублэн пуштросэз пумысен кенешизы, лэчыт ужпумъёс сярысь вераськизы.
«Оскем потэ, занятиос пиналъёслэсь удмурт лулчеберетэн но кылэн тунсыкъяськыны мылкыдзэс ӝутозы, нош паськыт учкыса – калык визез валаны, удмуртъёслэсь гинэ ӧвӧл», — шуэ Лариса Марданова.
«Ерпечкаос» нылпи клубын пумиськонъёс толэзяз одӥг пол ортчылозы. Удмурт кылэз дышетонъёс кырӟан, театр, киуж но эктон ӧръёсын пӧлэстӥськозы. Озьы ик удмурт шудонъёсын но сиён-юонэн тодматозы.