Удмурт кылъя «Ӝужась кизилиос» элькун лагере куриськонъёсты кутон мынэ Удмуртиын
Лагере 7–11 классын дышетскись 40 пала пиналъёсты возьмало. Туннэ нуналлы Кизнер, Алнаш но Можга ёросъёсысь мылкыд карисьёс куриськонъёссэс сётӥзы ни. Тросэз соос пӧлысь кылем арын удмурт кылъя сменае ветлэмъёс.
«Алнаш, Можга — соос ик лыкто. Соос кылем арын ик кошкизы, ми ик лыктом шуыса», — вера — Елена Маркова, «Шунды» огазеяськонлэн Кизнер ёросысь ёзэтэзлэн кивалтӥсез.
Со верамъя, туэ «Ӝужась кизилиос» лагерь Кизнер школаын ортчоз. Пиналъёс доры куное «Шунды» огазеяськонлэн ёзчиосыз лыктозы. Озьы ик элькунын удмурт кылъя курсъёсты радъясь Ангелина Решетникова Венгриысь эшъёссэ вайыны медэ. Сменае вуэм куноос пиналъёс понна асьсэ ӧнерзыя мастер-класс ортчытозы.
«Милям валтӥсь ужпуммы — удмурт пиналъёслы возьматыны дано адямиосыз Удмуртиысь, кудӥз потэмын именно гуртысь но улоназы кыӵе ке вормонъёс лэсьтӥзы», — вераз Елена Маркова.
Ватсалом, Елена Маркова кичӧлтэмъя Кизнер ёросын радъям удмурт кылъя нырысетӥез элькун смена кылем арын Безменшур школаын ортчиз. Отчы Кизнер, Алнаш но Можга ёросъёсысь удмурт кылэз тодӥсь но валась 40 пиналъёс пыриськизы. Куноос пӧлын Удмурт йӧскалык театрысь артистъёс, журналистъёс но калык кусыпъёсъя ӧнерчиос вал.
«Ӝужась кизилиос» лагере таяз арын пыриськыны мылкыд карисьёслы куриськонъёссэс kiznerddt@yandex.ru электрон адресъя келяно.