Удмурт кылъя но литературая дышетӥсьёслэн огазеяськонъёссылэн улосвылкуспо вожвылъяськонзы кутскиз Удмуртиын

Ужан амалъёссэс возьматыны лыктӥзы Юкаменск ёросысь но Татарстанысь Агрыз ёросысь огазеяськонъёслэн кивалтӥсьёссы Лариса Булдакова но Ольга Широбокова. Соос конкурслэн куинь эскеронэз пыр потозы: огазеяськонлэсь ужан сӧзнэтсэ, ужан амалъёссэ возьматон; ёрос огазеяськонлэсь кенешонзэ ортчытонъя мастер-класс; «Мар пайдаёгес: предметъя методикая огазеяськон яке кыӵе ке но ужпумлы сӥзем туркым (группа)» темая дебатъёс.

Вожвылъяськонлэн ужпумъёсыз сярысь ивортодэтъя «Удмуртия» агентстволы вераз огез радъясез, «Вордскем кыл» журналлэн валтӥсь редакторезлэн воштӥсез, Удмурт кылъя но литературая дышетӥсьёслэн методикая элькун огазеяськонзылэн кивалтӥсез Андрей Клементьев.

«Ёросъёсысь методикая огазеяськонъёсты кызьы ке но бугыртыны, соослэсь ужан амалъёссэс вӧлмытыны, шараяны устооссэ соос пӧлысь — со стимуляция выллем луоз соослы, мылкыдзэс ӝутон выллем. Нош мукетыз мугез — кык арлы одӥг пол Удмуртиысь Дышетонэз азинтонъя институт «XXI даурысь методист» нимо вожвылъяськон ортчытъя, вуоно арын со ӵапак нош луоз, отын одӥгез номинация «Методикая огазеяськонлэн кивалтӥсез». Сыӵе малпан вань, татын вормисез «XXI даурысь методист» вожвылъяськонэ пыриськоз шуыса», – Клементьев шуиз.

Вожвылъяськонэ пыриськисьёс асьэды возьматэм сяна, асьсэ понна мар ке но выльзэ тодыны малпало.

«Адӟем потэ, кызьы ужало мукет школаос, мукет огазеяськонъёс, мукет ёросъёс. Собере кыӵе ке но адреналин-а, мар-а! Выльзэ тодэм потэ, кыӵе ке но аслэсьтыд итог лэсьтэмед потэ — пӧрме-а яке умойтэм-а тон ужаськод. Умойтэм ужаськод ке, тани та конкурсысь адӟом но собере нош ик выль кужымъёсын, выль малпанъёсын ужалом», – Лариса Булдакова вераз.

Агрыз ёросысь дышетӥсьёс вераны малпало, мар тужгес кулэ каро али Татарстанысь дышетон удысын, мар куро. Озьы ик соослы Удмуртиысь ужъюлтошъёссылэн ужан амалъёсынызы тодматскыны тунсыко.

«Ми, удмурт кылъя дышетӥсьёс, кылимы ке мукет предметъёсъя дышетӥсьёслэсь, кончено, нылпиосмылы тунсыко уз луы. Соин ик огазеяськонамы но вань выль ӧръёсты, кудъёсыз дышетонын пыӵало (уката ик милям Татарстан вань выльдӥськонъёсты нырысь ик кутэ), тыршиськом соя ужаны», – Ольга Широбокова пусйиз.

Ужрадэ люкаськемъёслы пайдалыко уж сӥзизы Дышетонъя но тодосъя министерствоысь ыстэм муртъёс, элькунысь Печатья но калыке ивортодэт вӧлмытонъя агентстволэн кивалтӥсез Алексей Воронцов, Кун Кенешысь тодосъя, дышетонъя, лулчеберетъя, йӧскалык но егитъёсын ужан политикая но спортъя ялан ужась ӧрилэн кивалтӥсез, «Удмурт Кенеш» огазеяськонлэн тӧроез Татьяна Ишматова.

«Зэмос удмурт кыл возиське дышетӥсьёс вылын. Туж потэ вал, та вожвылъяськон гинэ медам луы — кин умойгес, кин уродгес. Со зэмос дышетскон мед луоз ог-огдылэсь но, ми но тӥлесьтыд адӟем мед каром. Асьмеос тросгес шуг-секытъёс сярысь вераськиськом, но татын тросгес вормонъёсты кылэм потэ вал. <…> Асьмеос но, кусып тупатыса, ог-огмылы юрттыны мед быгатысалмы. Тӥ, практикаен герӟаськем адямиос, валаськоды, кыӵе юрттэт тӥледлы кулэ, кыӵе кулэ нормативно-правовой документъёсы тупатъян пыртыны яке выль мае ке кутыны», – Ишматова шуиз.

Удмурт кылъя но литературая огазеяськонъёслэсь кивалтӥсьёссэс дунъялоз нимысьтыз жюри: отчы «Вордскем кыл» журналысь, Удмуртиысь Кун Кенешысь, элькунысь Дышетонъя но тодосъя министерствоысь, тодосъя но дышетонъя ужъюртъёсысь ыстэм муртъёс пыро.

Вожвылъяськонэ пыриськыны мукет мылкыд карисьёс понна эшшо кык нунал пусъемын: 11-тӥ коньывуон но 13-тӥ толсур. Ӵапак толсуре тодмо луоз ёросысь удмурт кылъя но литературая дышетӥсьёслэн устоез огазеяськонзы.

Ватсалом, удмурт кылъя но литературая дышетӥсьёслэн методикая огазеяськонъёссы элькунысь ваньмаз сямен ёросъёсын вань. Тужгес бадӟымъёсыз — Алнаш, Шаркан, Пичи Пурга, Можга ёросъёсын, пусйиз Андрей Клементьев.

«Ӧвӧл Сарапул ёросын, малы ке шуоно отын али гинэ кутскизы ай удмурт кылэз дышетыны, Камбаркаын, Каракулиноын ӧвӧл — отын удмурт кылэз уг дышето. Ӧвӧл со Глазкарын но Вотка карын, малы ке шуоно отын быдэн одӥг школаын гинэ дышето удмурт кылэз», — валэктӥз со.

Вожвылъяськонэз «Вордскем кыл» журналлэн редакциез но Удмурт кылъя но литературая дышетӥсьёслэн методикая элькун огазеяськонзы Удмуртиысь Печатья но калыке ивортодэт вӧлмытонъя агентство но элькунысь Дышетонъя но тодосъя министерство юрттэмен ортчыто.
Ивортодэтъя «Удмуртия» агентстволэн сайтысьыз басьтэмын: https://udmurt.media/udm/news/obrazovanie-i-nauka/33918/
Поделитесь с друзьями:

Журналист, редактор, контент-менеджер сайта, СММ специалист, оператор-постановщик интернет-телеканала "Даур ТВ"

Дом Дружбы народов
Добавить комментарий