Удмурт кылъя курсъёс кутско

29-тӥ куарусёнэ Калыкъёслэн Эшъяськон юртазы курсэз радъясьёс анай кылэз дышетыны мылкыд карисьёсын пумиськылӥзы, Вера удмурт кылъя дышетӥсьёслэн «Выжы» Ассоциацизылэн кивалтӥсез Ангелина Решетникова:

«Удмурт кылмы быре, шуо. Соин ик котькудӥз, кин мылкыд каре удмурт кылмес дышетыны пичи шапык ватса кылмес улӟытыны, сое утьыны. Элькунысь Йӧскалык политикая министерство туннэ бадӟым юрттэт сётэ – удмурт кылэз дышетонъя курсъёс чылкак дунтэк радъясько. Коньдонэн ужпумъёсты ас вылаз басьтӥз министерство.

Курсъёс 2008-тӥ арын рос-прос ужаны кусткизы. Со дыр ӵоже 1000 пала адямиос соос пыр потӥзы. Шӧдскымон лыдпус йылӥз ёросъёс итӥськем бере. Нырысетӥосыз пӧлын вал Можга но Дэбес, собере Пичи Пурга но Кез. Таяз паларе ватсаськизы эшшо 3-ез. Табере курсъёс ужалозы Эгра каргуртын, Грах но Якшур-Бӧдья черкогуртъёсын».

Таяз семестрын Ижкарын 6 группаос ужалозы, ёросъёсын — 10. Занятиос 3 толэзь ӵоже мынозы – коньывуонысен толсурозь. Соос арнялы 2 пол ӝытъёсы ортчылозы. Курсъёс йылпумъяськем бере, удмурт кылэз дышетыны кутскем сярысь сертификат сётиськоз.