Удмурт кыллэсь дунневыл нуналзэ пусъёзы 27-тӥ шуркынмонэ

Удмуртиын та нунал улсын тодосъя конференци, удмурт кылын фильм возьматон но удмурт кылэз азинтонъя ӵектосъёслы сӥзем неконференци чакламын.

“Со удмурт кыл сярысь вань сюлмаськисьёслы усьтэм лекция. Сӥземын луоз кылъя кичӧлтонъёслы, кин кылэз улӟытонъя ӵектосъёс лэсьтэ, кылсярысь, «Шудком», кыӵе ке приложениос. Сыӵе вакчи докладъёс паськыт аудиторилы”, – шуиз Алексей Шкляев, Удмурт кылъя дунневыл нуналэз радъясь.

Удмурт кыллэсь дунневыл нуналзэ Москваын но пусъёзы. Со улсын Ольга Урасиновалэн «Введение в удмуртский язык» лекциез, удмурт кылбуретлэн ХХ даурын азинскемез сярысь кенешон но удмурт кыллэн Удмуртиын туала югдурез сярысь вераськон ортчозы.

Удмурт кыллэсь дунневыл нуналзэ пусъён понна 27-тӥ шуркынмон юнме быръемын ӧвӧл. Ӵапак та нуналэ 2001-тӥ арын «Удмурт Элькунысь кун кылъёс но Удмурт Элькунын улӥсь мукет калыкъёслэн кылъёссы сярысь» кат юнматэмын. Соя удмурт кыл Удмуртиын кун кыл инлык басьтӥз.

Праздникез кичӧлтӥсьёс Удмурт кыллэсь дунневыл нуналзэ интыосын радъяны мылкыд карисьёсты витё. Куриськон сётыны луоз info@udmurtkyl.ru электрон почтае.

Пусъем, удмурт кыллэсь нуналзэ юнматон сярысь вераськонъёс кемалась мыно ни. Удмуртъёслэн нырысетӥ ӧтчамзы дырысен 100 ар тырмонлы сӥзем конференциын Алабгоын но туэ со сярысь кенешизы но та ужпумез ужрадлэн резолюцияз пыртӥзы.

Ватсалом, кичӧлтӥсьёслэн верамзыя, 28-тӥ шуркынмонэ Венгриысь Сегед карын удмурт кылэз дышетӥсьёсын пумиськон ӝыт ортчытыны малпало.

https://udmurt.media/udm/news/obshchestvo/45035/

Контентмейкер, мемолог и журналист

Дом Дружбы народов
Добавить комментарий