Удмурт кылэз дышетыны юрттоз телефон

    «Кылдысин» но «Удмуртско-русско-английский разговорник» ватсэтъёс бордын ужаз Пичи Пурга ёросысь егит программист Григорий Григорьев, дизайнзэ лэсьтӥз «Монами» удмурт студия. Таӵе куронэн соослы вазиськиз Йӧскалык политикая министерство.

    — Та ватсэтъёсты мон лэсьтӥ 2 толэзь куспын, — вера егит програмист. – «Кылдысин» ватсэтлэн пуштросэз — кылъёсты, кылтэчетъёсты тренажёр пыр дышетон. Озьы ик отын вань грамматической материалэз но. Тужгес секыт вал  кылэз дышетонъя методикаез валаны. Со понна мон юромо дышетӥсьёс доры но вазиськылӥ, та выллем ик мукет программаосты учкылӥ.

    Тодады вайытом, Григорий Григорьев милемлы тодмо ни телефонэ чаклам удмурт приложениосыныз, шрифтъёсыныз. Соос пӧлын, кылсярысь, «Ӟенелик» шудон, нош телефонысь но компьютерысь удмурт шрифтъёстэк удмурт егитъёс улыны ик уг быгато ни кадь.

    Удмурт кылэз дышетонъя электрон программаослэн кулэлыксы кемалась кылдӥз вал ни. Уго калык удмурт кылэн арысь аре золгес тунсыкъяськыны кутске. Сое адӟиськом удмурт кылъя курсъёсысь но — арысь аре удмурт кылэз дышетыны мылкыд карисьёслэн лыдзы будэ. Татарстанын нош, кылсярысь, бигер кылэз дышетонъя нимысьтыз сайтсы («Ана теле») но вань.