Удмурт кылэз азинтон ужпумъёсты Россиысь дышетон удысысь валтӥсь ӧнерчиосын ӵош эскерозы Удмуртиын

    Удмурт кылэз азинтон ужпумъёсты россиысь дышетон удысысь валтӥсь ӧнерчиосын ӵош эскерозы удмуртиын 1

    Кызьы веразы пумиськонэ пыриськисьёс, удмурт кылэз вӧлмытон, сое дышетон ласянь уж элькунын умой пуктэмын, но тодосъя ӧнерчиосты дасянын вань мар бордын ужаны. Вераськон мынэ учебникъёсты гожтӥсьёс, вузъёсын дышетӥсьёс сярысь.

    Удмуртилэн тӧроез Александр Бречалов 2020-тӥ арын шуркынмонлы элькунысь мерлык но экономика удысъёсты 2030-тӥ арозь азинтонъя стратегиез дасяны ужпум пуктӥз. Ярослав Семёновлэн верамезъя, отын кутскон, ӧнер но вылӥ дышетон нимаз ӧре висъямын. Кылэн герӟаськем ужпумъёс дышетонэз азинтон стратегие пыртэмын луыны кулэ, пусйиз кивалтэтлэн тӧроез.

    «Озьы ик ми вуоно арын сӥзьыл котырес ӝӧк ортчыны малпаськомы, отчы быдэс Россиысь дышетон удысысь 50 пала валтӥсь ӧнерчиосты ӧтёмы. Милям ужпуммы – отын кенешон пыр но удмурт кылэз азинтонэн герӟаськем пумкылъянъёс кутыны. Ми валаны кулэ, кыӵе югдурын асьмеос али, мар умоез вань, кыӵе тырмымтэос, но соя ужаны», — шуиз Ярослав Семёнов, Удмуртиысь кивалтэтлэн тӧроез.

    Кылосбур тодосъя доктор Татьяна Зайцева вераз, ӧнерчиос тырмытэмен герӟаськем ужпумез сэрттыны-пертчыны юрттысал улосвыл грантъёсъя сӧзнэт кылдытон. Наукаен вырыны мылкыд карисьёслэн лыдзы кулэсме.

    «Улосвыллэсь грантэн юрттэт сётон ужпумез коньдэт ласянь рос-просгес эскеромы, собере кенешомы ини, кыӵе ужпум пуктӥськомы, кин сое басьтыны быгатоз, мар ми солэсь басьтыны кулэ но мар каромы со ужъмышъёсын», — вераз Ярослав Семёнов, Удмуртиысь кивалтэтлэн тӧроез.

    Кылосбур тодосъя доктор Наталья Кондратьева вераз, та дыре координаци ёзэс но тодосэз азинтонъя ужанрадлык уг тырмы шуыса, кудӥз вань инъет луись (фундаментальной) ужез радъясал. Удмуртиысь йӧскалык политикая министерство бордын кылэз азинтонъя программа вань, но отын валэктон, югдытон ужлы тросгес саклык висъямын, угось дышетонэн герӟаськемын, тодос ужпумъёсын со уг йӧтылы.

    «Мер кенеш, ужась группа – форматэз пӧртэм луыны быгатэ, но сыӵе площадка одно ик луыны кулэ. Мон со ужлы дурбасьтыны дась», — шуиз Ярослав Семёнов, Удмуртиысь кивалтэтлэн тӧроез

    Озьы ик пумиськонын удмурт кылэз ӟеч тодӥсь журналистъёсты нимысьтыз дасян, йӧскалык дышетонэ цифровой амалъёсты пыртон но мукет ужпумъёс сярысь вераськизы.

    Удмурт кыллэн нуналаз улосвыл кивалтэтлэн тӧроеныз пумиськонэ Пумиськонэ Удмурт кун университетысь Удмурт кылосбуръя финно-угроведениея но журналистикая институтлэн кивалтӥсез Наталья Кондратьева, Институтысь удмурт литературая но Россиысь калыкъёслэн литератураоссыя кафедралэн кивалтӥсез Татьяна Зайцева, журналистикая кафедралэн кивалтӥсез Дмитрий Ефремов, Эскеронъёсъя удмурт федерал центрлэн Историяя, кылъя но литературая удмурт институтысьтыз кылосубр эскеронъёсъя секторен кивалтӥсь Алевтина Камитова, Дышетон удысысь йӧскалык ужпумъёсты эскеронъя тодос институтлэн кивалтӥсез Надежда Ураськина, Удмуртиысь дышетонъя но тодосъя министрлэн нырысетӥ воштӥсез Ирина Крохина, Кун Кенешысь тодосъя, дышетонъя, лулчеберетъя, йӧскалык но егитъёсын ужан политикая ялан ужась ӧрилэн кивалтӥсез «Удмурт Кенеш» огазеяськонлэн тӧроез Татьяна Ишматова.

    https://udmurt.media/udm/news/obrazovanie-i-nauka/71147/