Удмурт кылэн тодматоз Арки
![Удмурт кылэн тодматоз арки 1](https://udmddn.ru/wp-content/uploads/2022/12/vca1o57ekxdvbus4qantwmrlztod0r9iban-hvpvbd7otjg2l2kxntmyrrvxllxunnezvbe-gpnf6ydophx1eivc.jpg)
Удмурт кыллэн нуналаз «Артэ» огазеяськон аслаз «ВКонтакте» бамаз поттӥз удмурт кылэн тодматскыны мылкыд карисьёс понна вакчи мультфильмъёс. Отын валтӥсь герой Арки учкисьёсты пӧртэм удысъёсын тодматэ.
Но та мультфильмъёс — бадӟым ужлэн оглюкетэз гинэ, «Артэ» огазеяськонлэн арки-лаб.ру сайтаз удмурт кылэз дышетыны луэ мультфильмъёс, презентациос, подкастъёс но онлайн-шудонъёс пыр.
Озьы мультфильмъёсын Арки учкисьёсты семьяеныз тодматэ, нюлэскы, зоопарке, магазинэ ветлэ… Герой вераське Мунё театрысь актёрлэн Илья Акиловлэн куараеныз.
Мультфильмъёсты быдэсак лэсьтӥз дизайнер Марина Степанова: дышетӥсьёслэн ӵектонъёссы вылэ пыкъяськыса, со суредаз валтӥсь героез, анимация лэсьтӥз. Мультфильм котькыӵе темаез мытэ.
![Удмурт кылэн тодматоз арки 2](https://udmddn.ru/wp-content/uploads/2022/12/vca1o57ekxdvbus4qantwmrlztod0r9iban-hvpvbd7otjg2l2kxntmyrrvxllxunnezvbe-gpnf6ydophx1eivc-1024x576.jpg)
Мультфильмъёсысь басьтэм тодон-валанэз юнматон понна презентациосты учконо. Соос бордын трос ужаз Кузебай Герд нимо гимназиын 10-тӥ классын дышетскись Кристина Гаврилова.
Кылъёсты шонер вераны юртто аудиоподкастъёс. Соослы крезьгур гожтӥз, радъяз Кузебай Герд нимо гимназиын дышетӥсь Кирилл Кириллов.
Нош вань тодэмез йыре лач-лач кельтон понна онлайн-шудонъёс кылдытэмын, соос бордын ужазы «Кванториум» центрысь ӧнерчиос.
Вань урокъёсты луэ шедьтыны проектлэн сайтысьтыз. Сое 2 кылын лэсьтӥзы Кузебай Герд нимо гимназиысь ӧнерчи Вадим Крестьянинов но Эшъяськон юртысь методист Августина Михайлова.
Та урокъёс туж тупалозы 5-9 аресъем нылпиослы. Дышетӥсьёс соосты ужазы каллен-каллен куто ни, верало, пиналъёслы туж яра шуыса.