Дом Дружбы народов

    Удмурт кылэн тодматоз Арки

    Удмурт кылэн тодматоз арки 1

    Удмурт кыллэн нуналаз «Артэ» огазеяськон аслаз «ВКонтакте» бамаз поттӥз удмурт кылэн тодматскыны мылкыд карисьёс понна вакчи мультфильмъёс. Отын валтӥсь герой Арки учкисьёсты пӧртэм удысъёсын тодматэ.

    Но та мультфильмъёс — бадӟым ужлэн оглюкетэз гинэ, «Артэ» огазеяськонлэн арки-лаб.ру сайтаз удмурт кылэз дышетыны луэ мультфильмъёс, презентациос, подкастъёс но онлайн-шудонъёс пыр.

    — Та проект бордын ми ужамы ӝыны ар пала,— вераз «Артэ» огазеяськонлэн кивалтӥсез Юлия Шахтина. — Нырысь ик ми люкаськимы удмурт кылъя дышетӥсьёсын ӵош, соос пӧлын удмурт кылъя учебникъёсты кылдытӥсьёс но вал. Ми малпаськимы, кызьы проектмес радъяны, мультфильмъёсын ма сярысь вераны. Дышетӥсьёс дэмламъя отчы пыртэмын сыӵе темаос, кудъёсыз ӟучомем нылпиослы секытэнгес сётӥсько.

    Озьы мультфильмъёсын Арки учкисьёсты семьяеныз тодматэ, нюлэскы, зоопарке, магазинэ ветлэ… Герой вераське Мунё театрысь актёрлэн Илья Акиловлэн куараеныз.

    Мультфильмъёсты быдэсак лэсьтӥз дизайнер Марина Степанова: дышетӥсьёслэн ӵектонъёссы вылэ пыкъяськыса, со суредаз валтӥсь героез, анимация лэсьтӥз. Мультфильм котькыӵе темаез мытэ.

    Удмурт кылэн тодматоз арки 2

    Мультфильмъёсысь басьтэм тодон-валанэз юнматон понна презентациосты учконо. Соос бордын трос ужаз Кузебай Герд нимо гимназиын 10-тӥ классын дышетскись Кристина Гаврилова.

    Кылъёсты шонер вераны юртто аудиоподкастъёс. Соослы крезьгур гожтӥз, радъяз Кузебай Герд нимо гимназиын дышетӥсь Кирилл Кириллов.

    Нош вань тодэмез йыре лач-лач кельтон понна онлайн-шудонъёс кылдытэмын, соос бордын ужазы «Кванториум» центрысь ӧнерчиос.

    Вань урокъёсты луэ шедьтыны проектлэн сайтысьтыз. Сое 2 кылын лэсьтӥзы Кузебай Герд нимо гимназиысь ӧнерчи Вадим Крестьянинов но Эшъяськон юртысь методист Августина Михайлова.

    Та урокъёс туж тупалозы 5-9 аресъем нылпиослы. Дышетӥсьёс соосты ужазы каллен-каллен куто ни, верало, пиналъёслы туж яра шуыса.

    — Али туж потэ вал, мультфильмъёсты садикъёсын, школаосын, семьяосын мед кутозы шуыса,— вера Юлия Шахтина,— вуоно аре, пӧртэм ёросъёсы потаса, со сярысь ивортылыны тыршомы. Тросэз юало, азьланьтомы-а та ужез. Конечно, туж потэ вал. Но со понна трос коньдон но кужым кулэ. Туэ милем юрттӥзы Президентлэн лулчеберет удысысь кичӧлтонъёсъя фондэз но Удмуртиысь Йӧскалык политикая министерство.