Удмурт эктонъёсты дышетӥзы Удмуртие калыккуспо гужем школае дышетскыны лыктэмъёс
13-тӥ пӧсьтолэзе куноос удмурт эктонъёсын тодматскизы. Парен, тямысэн, урам эктонъёсты, шудонъёсты дышетӥзы Удмуртиысь чеберлыко киужъёсъя центрысь куиськонъя ёзэтысь ӧнерчиен, трос аръёс ӵоже «Эктон корка» студиын эктэм Татьяна Тихоноваен ӵош. Арганэн но кубызэн шудӥз центрлэн кивалтӥсезлэн калык искусствоя но чеберлыко киужъёсъя воштӥсез Алексей Кузнецов.
Европаысь кунъёсысь, США-ысь лыктэм муртъёс понна, уката ик егитъёслы, удмурт калык крезьгуръёс тунсыко потӥзы. Но гурзэ шедьтытэк, радзэ валатэк эктыны капчи ӧвӧл. Озьы ке но, ваньзы туж тыршизы — сураськылӥзы но выльысь кутскизы. Эктонъя урок кельшиз кадь. Дорамы бертӥмы ке, эшъёсмылы, семьяосмылы одно ик возьматомы шуизы.
Тодэ вапйытом, Удмурт кун университетысь Удмурт кылосбуръя, финно-угороведениея но журналистикая институтын удмурт кылэз дышетонъя калыккуспо гужем школа 10-тӥ пӧсьтолэзе усьтӥськиз. Курсъёсы вить адями вуиз.