Удмурт Кивалтэтлэсь «Признание» премизэ басьтозы
Премия 2007-тӥ арысен сётъяське 5 номинациосъя: «Калык эктон», «Калык крезьгур», «Калык кырӟан», «Сяме пырем калык лулчеберет» но «Чеберлыко киужъёсъя усточи».
«Калык эктон» ӧрын туэ вормиз Кузебай Герд нимо йӧскалык гимназиысь калык эктонъя «Чебеляй» нылпи студилэн кивалтӥсез Наталья Чиркова.
«Чебеляй» ансамбле трос пиналъёс ветло — пичиосыз но, бадӟымъёсыз но. Соос удмурт но ӵыжы-выжы луись мукет калыкъёслэсь эктонъёссэс дышето, быдэсто.
«Чебеляй» кылдӥз 16 ар талэсь азьло Ижкарысь Кузёбай Герд нимо гимназиын. Кылем арын юбилейзэс сӥё-дано пусйизы бадӟым концертэн. Та дыр ӵоже трос вал вормонъёс. Удмуртиын, Россиысь пӧртэм каръёсын но кунгож сьӧрын концертъёс. Нош ансамбльлэн азинсконъёсыз, вормонъёсыз — со пиналъёсын огкылысь улонлэн, коллективын кылдытэм мылкыдлэн емышъёсыз.
«Мон асме дышетӥсь ӧй шуысал, — вера Наталья Чиркова. – Мон – хореограф. Милям студияямы туж шунытэсь кусыпъёсмы. Азьвыл аръёсы но «Чебеляе» ветлэм пиналъёсын ми али ке но эшъяськиськом. Ми одӥг семья кадь. Мон туж яратӥсько пиналъёсме, данъяськисько соосын».
«Признание» премилэсь лауреатъёссэ сӥё-дано пусъёзы южтолэзь пумын — культура удысын ужасьёслэн ӧнер нуналазы. Нош собере «Чебеляйёслэн» улонзы азьланьтӥськоз ог дышем ӧръя: Удмуртиын кӧня ке концертъёс, собере Карелиын, нош сӥзьыл пичи артистъёсты Эстониын но Швейцариын витё.