Удмурт киноклуб нош ик ужзэ мытэ Ижкарын

    Удмурт киноклуб нош ик ужзэ мытэ ижкарын 1

    «Та аспӧртэм кыкетӥ тыршонмы. 2011-2012 аръёсы даслэсь трос фильмъёс удмурт кылэ берыктэмын вал. Со вал немец, француз, фин, мадьяр фильмъёс. Нырысетӥ фильм воксё но иран кылын вал. Ваньмыз соос киноклубын пӧртэм кинофестивальёсын возьматэмын вал. Кылсярысь, «Бызь, Лола, бызь», кудӥз али тулыспал пумын луоз. Мика Каурисмякилэн «Корка, кудаз будэ яратон», фин кылын», вера Алексей Шкляев, киноклублэн кылдытӥсез.

    Алексей Шкляевлэн верамезъя, 2010-тӥ аръёсы Berykton Lud клубез усьтонлэн малпанэз вал фильмъёсты удмурт кылэ берыктон, удмурт контент кылдытон но удмурт кылын котьмае лэсьтыны луоно шуыса возьматон.

    «Али, аръёс ортчыса ини, со валамон, нош соку валантэм вал. Соин ик сыӵе малпанмы кылдӥз, сыӵе культурной программа пыӵатыны кутским. Ваньмыз со удмурт кылосбуръя факультетысь берыктӥсьёслэн клубазы (Berykton Lud — ред.) лэсьтӥськиз. Берыктӥзы огъя кариськыса, ӵошен, мукет кунъёсысь берыктӥсьёсын интернет пыр», — шуэ Алексей Шкляев.

    Киноосты берыктон бордын трос тодмо, азьветлӥсь удмуртъёс тыршизы: Лукерья Шихова, Дарали Лели, Артём Малых, Ольга Урасинова, Лариса Широбокова но трос мукетъёсыз. Мадьяр но фин фильмъёсты фин но мадьяр кыллы дышетӥсьёс кивалтэм улсын берыктӥзы.

    Киноклуб бордын тыршисьлэн малпамезъя, фильмъёсты возьматон удмурт кылэ берыктӥсьёслэсь выль командазэс кылдытыны юрттоз но выль фильмъёс берыктэмын луозы.

    «Бызь, Лола, бызь»: Лола но Манни Берлинын уло но ог-огзэс юн ярато. Но куке Манни — йыртэмасьлэн юрттӥсез — солэн коньдонэныз сумкаез ыштэ. Солы Лола гинэ юрттыны быгатэ. 100 сюрс марка шедьтон вылысь, нылашлэн 20 минутэз гинэ вань. Котькуд секунд улонлэсь но кулонлэсь пӧртэмлыксэс возьматыны быгатэ. Соин ик, дасяське йырез поромытӥсь но кышкыт «шудонлы». Лолаен ӵош одӥг гинэ паймон учыр пыр потоно уз луы…
    https://udmurt.media/udm/news/kultura-i-turizm/51317/